香港唔少企業係由家族經營開始，但去到呢個年代，又發展得咁上下，啲人又驚太家族化唔多好。香港會計師公會最新一期刊物，探討過呢個問題，仲quote咗李錦記執行董事李惠民（Eddy）嘅管理哲學，講得相當有道理。
李錦記有124年歷史，絲絲覺得，始終會有家族成員喺公司做嘅，當去到董事會，哎起交嚟屋企人都會隨時擘面。Eddy已經係第四代嘅管理人，佢話，「一安士嘅預防，好過一磅嘅治療」，最好就係喺衝突出現、或者家族關係同業務「有病」之前，防患於未然。因為「有時當病情轉到太壞，又或者太遲，就無得醫」！佢哋好着重公司管治，嚴禁將公事同家事混為一談。
大約十年前，佢哋出咗「迷你憲法」，管束家族成員對業務嘅參與度，仲限定只可以有一位第四代家族成員，喺調味料同健康產品兩條生產線擔任管理層，目的係避免公司入面有太多波士。Eddy仲話由七個家族成員組成嘅「評議會」，一年開四次會，會以少數服從多數方式，集中意見做決策，萬一打成平手又點算？答案係：擲骰仔！
佢哋仲有「家庭辦公室」處理屋企瑣事，又可以作為業務同家族之間嘅橋樑，好似屋企買唔買多架車，買唔買多份保險都關佢事。
不過，Eddy話「呢啲規則都係硬件嚟嘅啫，都係軟件緊要啲。講緊嘅係家庭成員之間嘅關係、家族與生意之間嘅關係，仲有信任、理解，同埋對下一代嘅教育」。