呢個世界有啲好老闆，為咗想員工返工開心啲，就將個office整到靚一靚。好似facebook（fb）咁啦，前幾年先至將總部搬入去硅谷嘅Menlo Park，依家又話要擴建總部嘞！
絲絲聽講，新總部嘅設計由著名建築師蓋瑞（Frank Gehry）嘅事務所負責，將佔地42萬平方英尺，相等於八個足球場嘅面積。而內部嘅間隔就會跟番總部現時嘅設計，目標都係要為員工提供一個開放嘅工作空間，令佢吔唔好有太大壓迫感。擴建之後，現時位於Menlo Park嘅總部就叫做東園區，新建成嗰一棟就係西園區，兩個園區中間仲會有隧道同軌道電車連接。
有個又大又靚嘅新office，都要有一班精英喺裏面做嘢先有意義。fb打算叫佢吔嘅軟體工程師、設計師同埋產品主管搬去西園區；依家大約二千名員工唔夠填滿個office，所以fb會再請多7,400名員工，到時東、西園區分別會有6,600名同2,800名員工做嘢。
不過，fb自從上市後股價一直潛水，依家又咁大工程話要擴建總部，一班投資者都擔心擴建嘅資金從何而來。
絲絲希望新園區建成後，fb嘅員工都會珍惜呢個一流嘅工作環境，畀心機啲做嘢，幫自己公司爭番一口氣啦！