恒生（00011）早前舉行咗一場近200名同事及親友參與嘅保齡球賽，而零售銀行及財富管理業務主管陳力生（Nixon），仲夥拍香港保齡球男子代表隊成員麥卓賢落場，即席同家庭賽冠軍隊伍上演表演賽。雖然最後輸咗場波，但係就贏咗唔少掌聲，皆因Nixon專注打波時，真係好有魅力，可謂「有姿態、有實際」。
Nixon夥拍香港隊成員，比賽初段打咗幾局九分，本來一路領先，但家庭組冠軍隊兩父子落場，無論實力定合拍度都好高。結果家庭組冠軍隊喺最後兩局都打出全中，以4分之微勝出比賽。
其實，Nixon一隊嘅總分有145分，業餘參賽者嚟講，都算唔錯啦！雖然差幾分輸咗，但佢事後都覺得好滿意，仲話自己預早到場，熱過身，贏輸唔係問題，最緊要開心！
絲絲知道，恒生每逢有活動舉行，反應都會非常熱烈，幾乎次次都要抽籤揀幸運兒，真係要好有LUCK先可以參加到。好彩下半年球類比賽陸續有嚟，錯過咗今次比賽嘅員工，可以再報名啦！
余詩韻