萬眾期待嘅iPhone5傳聞會喺九月面世，可憐另一美國手機品牌摩托羅拉（Motorola），喺智能手機大戰中節節敗退，早前畀Google以125億美元收購。一班摩托羅拉中國員工就陰公囉，喺Google完成收購摩托羅拉三個月後，北京、南京等地分公司員工陸續收到「大信封」。
不過「塞翁失馬焉知非福」，絲絲據聞聯想、小米等公司打算向摩托羅拉中國員工拋出橄欖枝。
摩托羅拉近年業績麻麻，但畢竟有八十三年歷史，始終喺手機領域佔有一定江湖地位。佢嘅中國公司喺內地通訊界更有「黃埔軍校」嘅威名，蘋果中國區總裁盧雷、小米科技（微博）聯合創始人周光平博士、HTC中國區總裁任偉光嘅履歷表上都有一欄係摩托羅拉，證明佢哋嘅出品幾有保證。怪唔得呢頭摩記話裁員，嗰頭聯想、小米等就施以「援手」，招攬被裁員工，睇嚟佢哋好快有新碼頭囉。