多勞唔一定多得！好似工商銀行（01398）咁，貴為全球「最賺錢銀行」，但「最賺錢銀行家」就冇董事長姜建清嘅份喇，呢個美譽就畀摩根大通主席兼行政總裁戴蒙攞咗，兩人收入差天共地，就連外國傳媒都睇唔過眼，將佢哋比併一番。
究竟有幾差天共地，彭博社做咗個統計，睇吓英美銀行每賺10億美元，最高領導人可以有幾多落袋。
絲絲睇完個結果，發現贏到開巷嘅仍然係華爾街大班，摩根大通主席兼行政總裁戴蒙上年收嘅人工、花紅同埋股票期權，加加埋埋總值2,300萬美元，即係銀行每賺10億美元，佢就有121萬美元落袋。
至於大家熟悉嘅獅子行大班，即係滙控（00005）行政總裁歐智華都無令人失望，上年薪酬2,100萬美元，係全英國最高人工嘅銀行CEO，即係滙控賺10億美元，佢有95.8萬美元。
跑輸幾條街嘅係工行董事長姜建清，工行上年賺咗超過2,000億人民幣，但係佢薪酬就得196萬人民幣，折番做美元，即係工行每賺10億美元，姜總都係得9,400美元落袋，連戴蒙同歐智華個零頭都唔夠。
不過內銀高層有另一樣嘢補數，就係仕途同權力喇，中證監主席郭樹清同中保監主席項俊波，都捱咗「低薪董事長」咁多年，依家做監管機構話事人，等到姜總入主人行時，相信佢條氣都會順番啲。