市場上都有上市財務公司，但對於其經營狀況及特點，其實一般投資者所知甚少。
一般而言，放債公司嘅業務非常多元化，包括有抵押及無抵押貸款。佢哋經營貸款業務，最重要係控制客戶嘅還款期，監察客戶嘅還款能力。
客戶可以經由放債公司，得到更靈活嘅貸款服務，有時銀行唔可以快速批核嘅個案，放債公司都可以批核得到。
今時今日，信貸資料庫嘅參考性已經大為提高，放債公司要爭取客源，主要係靠批核嘅靈活度。一間貸款公司能唔能夠彈得起，主要睇佢投放落風險管理部同埋銷售部嘅資源同成效。
風險管理部好嘅貸款公司，會知道點樣避開危險嘅貸款人，同埋充分利用信貸資料庫嘅資料，如果唔係的話，大學都唔會有一科專為風險管理而設啦！
至於銷售團隊，同一般嘅銀行職員有唔同。貸款公司嘅銷售團隊，接觸嘅好多時係需要靈活批核嘅客戶，好多時，呢種客戶個心七上八落，公司要合理咁提出一個互惠互利嘅方案，令貸款人有信心，先可以愈做愈大。例如，周身卡數嘅貸款人，好多時煩緊嘅係債務重組；有經驗嘅銷售員，就會知道點樣令到客戶幫自己公司做生意，而唔係流往其他公司。
睇番第一信用（08215）呢隻做放債生意嘅股票，近幾年投放唔少資源去擴大市佔率。同類型嘅股票如AEON信貸（00900）、新鴻基公司（00086）旗下的亞洲聯合財務，由於爆發力強，好多時會畀人喺低位收集。無他，呢類公司做嘅生意成本較低，依靠嘅主要係經濟嘅活躍度，有佢本身嘅周期。
第一信用自己設立咗市場推廣部，亦有搞唔同嘅市場推廣活動，喺媒體發廣告宣傳等等。集團好清楚自己嘅方向，就係要喺貸款靈活度方面優於同儕，所以不斷研發擴大貸款組合，去針對客戶群做口碑。
最重要當然係，大家知道神州水緊，放債業務大有可為，如果唔係就唔會催生咗咁多地下錢莊啦！集團喺內地放債同證券保證金融資業務嘅商機拓展成功，會係一隻大大金蛋！
香港大學電子金融服務榮譽助理教授 徐燦傑