港交所（00388）披露易的上市公司通告是股民獲取上市公司資訊的重要途徑，準確要求度極高，可惜過去一段時間披露易刊登的上市公司資訊經常出現爭議及錯誤，令投資者捉錯用神，甚至乎做錯投資決定，承擔不必要的風險！究竟公告內容會否受到監管？若果投資者因公告錯誤而蒙受了損失，又可否索償？
彩兒：只是計今年，已有唔少上市公司發表的公告，惹起爭議或有數字上的錯誤！
高妹：吓！咁樣會好影響我哋做投資決定o架喎！
彩兒：以現代美容為例，早前明明發盈喜o架嘛，點知後來公布業績時又話純利倒退！
高妹：係喎！現代美容嘅股價喺業績公布後急瀉逾20%，對我哋呢啲小股民好唔公平啫，所以我即刻去求證吓，點知現代美容首席財務總監梁文傑話唔再就事件回應喇！
彩兒：他們堅稱發盈喜係按照會計師建議，並非存心欺騙股東及投資者，仲話盈喜通告上已提醒投資者要審慎，應以最終發布數字為準。
高妹：不過，上市公司應該有責任確保通告準確無誤！
彩兒：港交所發言人表示上市公司須根據《上市規則》刊發公告，除非是涉及重大交易的通告，否則港交所並不會預先審閱，因過程需時，將減慢資訊發布效率，所以上市公司須對公告內容負全責，確保資料準確完備，且不具有誤導或欺詐成分。如若內容失實或有遺漏，有關公司便需另發公告澄清，並負上引起的法律責任。
高妹：獨立股評人David Webb曾任港交所非執行董事，他同意公告的發布責任在上市公司，因披露易系統只是上市公司與投資者的溝通平台，但港交所的監管及處理手法應以投資者利益為大前提。不過，既然港交所毋須負責，上市公司亦唔肯承擔，咁散戶因公告錯誤而招致投資損失，咪即係要自己硬食？
彩兒： 我已徵詢法律意見，商業法律事務律師蕭鎮邦指，若果上市公司發放的資料失實，港交所可就事件的嚴重性懲處相關公司，輕則私下警告，重則公開譴責批評，進行紀律處分。倘若投資者因通告內容而蒙受損失，可根據證券及期貨條例而作出追討。不過，追討過程相當複雜困難。由於股價的升跌乃涉及多項因素，並不會純粹因為通告內容，亦很難證實投資者的決定是否只受到通告內容影響，所以一般均難以進行訴訟。
高妹：仲有呀，散戶多是小資小本，又點畀得起龐大的訴訟費呀，分分鐘輸掉六位數字，都未夠畀訴訟費呀！
彩兒：散戶均認為現時市場立立亂，他們經常投訴無門，只可靠自己審慎應對咋！
高妹：而且有時仲唔只係上市公司出錯，好似呢排利君（02005）嘅業績被提早錯誤上載，原因係印刷商出錯。不少圈中朋友也同意散戶的難處，當中中大全球政治經濟社會科學碩士課程兼任講師黃元山便指，上市公告係public information（公開資訊），本應是準確文件，但近日上市公司頻頻擺烏龍，投資者要格外留神。他認為部分公告錯得較為離譜，投資者可自行用common sense分辨通告內容的可信性。對於通告內容，散戶主要關心公司純利、開支、現金流等資料，但呢啲資料卻難分對錯，所以投資者要有風險意識，切忌鬥快炒消息呀！
香港專業財經分析及評論家協會主席鄧聲興提醒，投資場上風險處處，股民要小心衡量，縱使近日多宗通告均牽涉到人為錯誤，令到投資者遇上額外風險，但普遍散戶均難以追討損失。
另外，證券學會會長李細燕亦指，投資者的角色被動，若然公告內容有誤導成分，無奈大多散戶都只能硬啃，可應對的門路不多，惟有冀望港交所能夠加強監管措施。
遠東宏信（03360）上月二十日發表英文版公告講述同台灣簽訂嘅銀團貸款合同，卻把2億美元貸款寫到變成20億美元，足足借多咗十倍，唔知仲以為資金流出現問題！
今年三月山東威高（01066）錯把「無建議發行紅股」，寫成為「建議就每持有一股現有股份獲派一股紅股」，令到投資者誤以為有得一送一，點知最後得個「桔」！
周大福（01929）於七月頭發布年報，當時將公眾持股量嘅比例寫成10%，但隔咗成個月之後，先至澄清個正確數字係10.7%！
天瑞水泥（01252）上月底喺公告上寫錯咗公司儲備，明明有31.92億元人民幣，但卻寫成得番8.22億元人民幣，大拿拿少咗超過廿億元喎！
中國金石（01380）於月初曾因公告出錯而停牌。話說佢份英文通告印漏咗個「No」字，令到收購或變賣的商討活動由「無」變「有」，可謂顛倒是非黑白，後來仲特登停牌去澄清！
中國香精（03318）日前搞錯董事同主席，本想發出通告交代大股東王氏三兄弟內訌之事，點知就愈描愈黑，仲將事件的其中一名主角王明凡的職銜由「董事」變成「主席」，相當惹人猜疑呢！
錯別字時有發生，好似亞洲資產（08025）就喺三月發表公告話趕唔切印刷業績同上載時間表係「謹迫」所致！的確，時間「緊迫」的情況下容易出錯，仲因而停牌嚇死一班小股民呢！
創維數碼（00751）曾搞錯「老細」，於六月發表嘅通告就寫錯咗董事會名單，無端端多咗位丁凱女士，但就少咗位施馳先生。
高妹、彩兒
若有料報畀高妹同彩兒或有嘢問，可電郵money.biz@opg.com.hk