港交所（00388）出版嘅官方刊物《交易所》，本來係每季出一次，之不過，資訊嘅嘢真係「唔留得」，否則就會變舊聞，所以佢哋都想追貼啲市場，出埋呢一期就唔會再出季刊喇，日後佢哋會將有關交易所發展嘅消息同埋資訊，喺完稿之後，即時登載喺港交所個網站，換言之，啱啱出版冇耐嘅《交易所》季刊就變成絕響，真係好有收藏價值。
呢個改變其實都啱嘅，好似呢一期就訪問咗港交所前主席夏佳理，回顧佢喺過去六年任內嘅工作。而港交所新任主席周松崗其實喺四月尾已經接任咗主席個位，如果夏佳理篇訪問唔係要就季刊個期，一早就出咗喇，根本唔使攤到凍晒。
金占士都拜讀過呢一本季刊，夏佳理真係爆咗好多內幕o架，除咗揭開點解會請李小加做CEO呢個神秘面紗之外，佢仲爆咗prada（01913）當初嚟香港上市嘅過程中，保密工夫有幾厲害，仲有AIA（01299）上市背後嘅感性故事。呢期絕對係高質素之作。
金占士