中國富豪要玩嘅高消費玩意，種類愈嚟愈多，高級音響係一環，嚟自丹麥嘅Bang & Olufsen深明此道，實行配埋股畀A Capital同耀萊控股，多咗支盲公竹，入內地市場方便好多！
A Capital係一間專注於中國對歐洲投資嘅成長股權基金，耀萊控股就較多香港人識，佢哋持有耀萊集團（00970）28%股權，耀萊老細係低調富豪綦建虹，專門將名牌引入中國內地，好似Burberry呢個品牌，係佢喺九十年代第一個引入內地嘅，仲曾經上過胡潤富豪榜添。
耀萊同A Capital總共用咗三千萬美元，認購B&O新股，相當於擴大後股本7.71%，耀萊會持6.12%，A Capital持1.59%，A Capital董事長龍博望仲會入埋董事局。
耀萊係中國奢侈品市場經銷商，喺中國經銷勞斯萊斯同賓利等豪華房車，不過據絲絲所知，B&O近年來都為唔少受中國富豪愛戴嘅房車，好似Audi、BMW同Aston Martin跑車等設計音響，例如Aston Martin專用嘅B&O BeoSound DBS系統。今次B&O接受耀萊嘅注資，會唔會想再進一步設計啱勞斯萊斯嘅汽車音響呢？