管理企業好多時就同打仗一樣，最緊要係將士賣命上下一心，聯想（00992）係全球增長最快嘅PC企業，作為舵手嘅主席楊元慶不但深明此道，仲出力出錢務求達成呢個目標。據聞楊元慶近日自掏腰包，喺自己嘅花紅中撥出300萬美元（約2,340萬港元），作為聯想鼓勵基層員工表現嘅現金獎賞。
楊元慶早已係中資科技企業嘅打工皇帝，到三月底嘅財政年度，總薪金1,421.8萬美元（約1.1億港元），而當中嘅516萬美元係按表現所獲嘅花紅，佢今次自掏嘅300萬美元，就相等於呢份花紅嘅58%，都咪話唔大手筆。
呢項畀聯想員工稱為「元慶特別獎」嘅現金獎賞，係針對今年四月前入職聯想嘅全球各地優秀員工，據聯想嘅人力資源負責人向傳媒表示，今次獲獎賞嘅萬名基層員工，佔聯想總員工嘅三分之一，職務涉及生產線工人、督導、助理同客戶服務中心，每名員工可獲約相等於2,000元人民幣嘅獎金。
無端端有二千大元獎金，員工梗係一致叫好，有員工形容，楊元慶今次嘅安排，對員工嚟講，係「最意外、最振奮人心嘅一次」，對提振員工士氣嘅正面作用已即時反映！
余詩韻