MARKET INSIGHT：食品股有下滑風險

上月環球十一間央行先後減息放水，據過往經驗，這對提高基金經理風險胃納有正面刺激。有趣是調查顯示，六月至今環球基金現金比重，只係由高位5.3%回落至4.9%，相對以往合理水平1至3%，反映基金仍然抱住現金就是王的心態，尤其認為看好新興市場股票的基金，較第一、二季時少，僅得19%（歷史平均約26%），對中國股市投資展望亦只係中性，反應也是一○年十月以來最差。

綜合各方面數字看來，基金手上不缺彈藥，可惜在包括中國在內的幾個新興市場經濟增長展望放緩之下，入市興趣唔大，形成今日買賣兩閒的悶局。

放大圖片

放大圖片

中國通脹，未來幾個月極有機會見2%甚至更低，寬鬆政策的彈藥多咗，昨日A股主要受到周末人行可能再減存備率的消息支持。受原材料價格回落，令毛利率由兩年低位反彈，今年古勝最睇好嘅消費食品股，至愛的「小食三寶」──旺旺（00151）、統一（00220）以及康師傅（00322），頭兩隻股價持續在高位徘徊，不過，快將踏入八月中期業績期，建議看官們不妨先獲利。

充分反映利好因素

一來毛利率改善的可能性，已經在股價反映得七七八八，二來，跑贏其他中資股一大段之後，估值的差距擴大，感覺開始有點昂貴，就算市況重返兩萬點水平樓上，一定不是基金經理博反彈首選。美銀美林報告話，內地副食品行業整體在第二季，增長放緩至單位數字，近期留意到其他分析員，與內地相關行業管理層接觸後，撰寫的預測大同小異，看來上半年業績具令人失望風險存在，短期要小心。

到港上市可免受氣

所謂人怕出名豬怕肥，近年中國冒起，頓成為各國假想敵，國際關係緊張，近期美國頻頻向中國「開火」，小到美國奧運代表隊制服，由中國生產，都惹來美國國會議員不滿。綜觀今日美國失業率高企，議員趁機討好選民乘機抽水，也可以理解。不過，近日美國上市的中國概念股份，唔少跌到七個一皮。事緣內地經營教育的新東方，畀美國證券交易委員會調查其VIE模式，出現單日急跌三成四的洗倉潮，也連累一眾美國上市內地公司，被基金糟質。

本地媒體較少提到，查實唔少行業，內地並無完全開放給境外投資者持有，例如傳媒、教育、消費、廣電類企業，假如要到美國上市集資招攬境外股東，只能通過VIE模式（Variable Interest Entities），內地稱為「可變利益實體」簡言之，是協議控制，境外股東可以分享到協議的經濟利益，可是實際卻沒有持有業務實體，雙方協議講個信字。

西方人不懂國情，VIE模式受質疑，有人認為係渾水一類鍾情炒落唔炒上的基金搵食，才把小事化大。美國上市的新浪網（SINA）、搜狐（SOHU）由年初高位跌近一半，反觀香港掛牌的騰訊（00700）今年仲有四成五升幅，顯然火頭未燒到香港，不過捧場客最好密切留意事態發展，諗來諗去，成件事最終可能益到港交所（00388），逼一眾中國TMT股，回歸到香港上市，唔使再睇華爾街班賓架面色。

弱股走勢多加留意

魚缸日升日跌，係咪大戶製造煙幕掩飾部署大單邊市，不得而知，但古勝相信，如今歐美都表態會放水刺激經濟，人行亦先後兩次減息，相信等過咗呢個盈警期，市況有改善嘅條件。見到近日中國人壽（02628）走勢偏強，似確有資金積極收集。另外，昨日午後兩隻中資電訊股聯通（00762）同中電信（00728）均明顯轉強，收市分別升5%及6%。可繼續留意早輪嘅弱勢股係咪可以陸續擺脫頹勢，若然如是，則季內國指有望醞釀一次較大型嘅反彈浪。

古勝