網上購物愈嚟愈流行，亦為繁忙都市人帶嚟方便，其中淘寶網更係唔少人成日「逛」嘅地方。最近有老友同絲絲講開，話見到恒大（03333）喺淘寶入面開咗間舖，入面唔係賣樓亦唔賣足球隊紀念品，而係賣童裝，「好評率」仲達到一百巴仙，估唔到恒大賣樓叻，連賣衫都一樣咁勁！
恒大呢隻內房股搞足球已經唔係咩嘢新鮮事，早排佢哋公司仲開埋間足球學校，搵埋皇馬教練教小朋友踢波，估唔到今次又有新花款。絲絲睇過佢哋喺淘寶嘅舖頭，除咗賣童裝，仲有啲公仔同埋周邊產品，主題全部都圍繞住五隻叫「生日夢精靈」系列嘅卡通人物。絲絲問過恒大嘅老友，話原來呢條line係屬於恒大文化產業入面嘅動漫部分，而入面嘅公仔就係佢哋動漫入面嘅人物。
睇番資料，其實恒大早喺一○年嘅十一月，已經豪花八點五億人仔，喺北京註冊成立恒大文化產業集團，旗下就包括影視公司、院線公司、發行公司、經紀公司、動漫公司、唱片公司六大板塊，覆蓋影視行業全個產業。老友話，依家套動漫仲未播，間舖又只係開咗無幾耐，所以好難講生意好唔好，不過絲絲睇番啲買家個個好評，各個指標都高過同行，有機會都要幫襯吓！