周松崗自從「空降」出任港交所（00388）主席後，近一個月以嚟，真係忙得不可開交，除咗要應付港交所嘅「世紀收購戰」競投倫敦金屬交易所（LME）外，周松崗仲要同唔同嘅團體、界別進行飯局交流，聆聽業界聲音，做一個「親民」嘅主席，唔忙就假。
繼本月二日同證券商協會飯局後，尋晚就輪到證券學會。絲絲聽聞，證券學會好重視今次飯局，會派出16人嘅代表出席飯局，相信該會嘅重量級，包括現任會長李細燕同永遠榮譽會長張華峰等都會畀面出席。
雖然呢啲飯局禮節成分居多，但聽聞證券學會都會把握機會向周松崗反映業界依家最關注嘅問題，即係「期指夜市」。業界最擔心嘅係，依家市況已經好唔穩定，仲要推出「期指夜市」，無疑令市況更加波動。
早前證券界七會曾經訪問新加坡取經，證券學會亦會借今次飯局嘅機會，向周松崗進言，既然新加坡嘅「黑池」都要關閉，香港就唔使擔心黑池交易商「來勢洶洶」，要搞咩嘢「隱名交易」等去迎戰喇！不過，周松崗係咪聽得入耳，絲絲就唔知了。