孖妹S檔案：facebook上市在即 財俊有幾like？

fb用家：股價起泡 抵玩唔抵抽

靈獅控股主席兼行政總裁 黃偉康

高妹：你玩咗fb有五年，依家佢搞上市喇，你會唔會抽番啲先？

靈獅控股主席兼行政總裁 黃偉康

放大圖片

黃：鍾意玩fb同投資fb係兩回事，而且估值咁貴，明眼人睇都知有泡沫喇！雖然fb擁有超過九億用戶，但有啲人開幾個戶口架嘛，我諗活躍用戶應該得五至六億左右。另外，fb主要畀你去搜尋朋友，而唔係畀搜尋廣告然後消費，性質同Yahoo、Google等網站有所不同。現時fb好多功能都免費，唔排除如果佢將功能或者服務變成收費時，將會流失大量用戶。總之佢要增加廣告收入唔容易，種種因素覺得fb前景一般，所以都係抵玩唔抵抽。

香港大學電子金融服務榮譽助理教授 徐燦傑

放大圖片

彩兒：你講得啱喎！我都好少睇fb嘅廣告，亦無喺fb買過嘢。

著名對沖基金經理 錢志健

放大圖片

黃：其實你有無諗過將來可能會有另一舊嘢取代fb？以前有ICQ，然後有MSN，依家有fb，仲有最新出嘅Google+，由此可見網絡潮流嘅發展係你估唔到嘅嘢！更何況，大部分網民都係貪新忘舊，所以fb上市後，管理層一定要重新思考業務發展模式，同埋不斷創新服務，咁先可以撐住股價。

李嘉誠fans網	巴菲特情報網	渣打銀行

fb用家：九億用戶 唔等於賺梗

香港大學電子金融服務榮譽助理教授 徐燦傑

彩兒：Professor J，你點睇今次fb招股上市呀？

徐：我玩fb都有三年，真係廿四小時長開o架。我諗你都聽過「無fb等於無朋友」呢句話喇！所以我唔會睇淡fb上市，因為佢嘅亮點正係擁有超過九億嘅用戶群，不過網絡世界好虛無縹緲，你點樣利用呢九億用戶形成一個傳播效應，繼而增加廣告收入，呢個係難題。而且fb仲有兩大風險，第一，入唔到內地市場；第二，除咗廣告收入外，仲可以點樣搵錢？呢啲都係投資者要思考嘅細節。

高妹：我有個親戚住喺美國，佢本來都話想抽fb，但因為估值太貴，所以最後決定放棄。

徐：今次fb招股上市擺明係「獅子開大口」，不過佢將自己個「古仔」包裝得好，又講得通，咁市場咪接受呢個高估值囉。雖然今天嘅科網股市場已經比當年進步好多，但一間公司嘅「內容」好重要，fb有九億用戶及廣告收入，但呢啲內容唔足夠長遠支撐利潤。早前，騰訊（00700）以影子股概念炒到上248蚊，好明顯係非基本因素，佢依家跌番廿幾蚊，大家都知咩事喇！

fb用家：估值高 買咗都要對沖

著名對沖基金經理 錢志健

高妹：如果以基金經理嘅角度與思維，你會點睇fb呢隻股票？

錢：我都有玩fb，我認為佢估值接近千億美元的確過高。雖然fb上市前有主要包銷商，但上市後股價變成點，呢個無人知。加上我唔知十月會唔會有環球股災出現，所以我唔會去抽fb，就算真係要買，都會等多半年，買咗亦會做足對沖。

彩兒：睇嚟你都有啲戒心喎！

錢：當你諗番○○年科網股爆破嘅年代，嗰時美國湧現大量互聯網公司，佢哋無盈利、無資產，但股價就狂升，其後呢啲公司極速上市又極速執笠，終於造成科網泡沫爆破。就算現時Yahoo同eBay依然存在，但其業務前景及盈利增長均停滯不前，而Amazon由唔掂，透過不斷改革，最終令業務起死回生，呢個係絕少嘅 成功例子。

孖妹心水 fb Page推介

李嘉誠fans網

長實（00001）主席李嘉誠既為本港國際企業家，亦係華人首富嘅傳奇人物，難怪有超級粉絲幫佢喺facebook整page，仲定時定候上載其人生兼投資金句，每個post都獲得過千個「讚」o架！另外，李嘉誠亦有「無寶不落」嘅稱號，所以佢一早已經買入fb股份，市傳當fb上市後會賺逾20億美元添，果真厲害呀！

巴菲特情報網

早前股神巴菲特話自己患咗早期前列腺癌，孖妹作為死忠粉絲，梗係擔心佢嘅病情喇！如果大家都想知道巴菲特嘅最新情報，或者巴郡消息，咁就要喺fb搵「 巴菲特情報網」喇，呢度有fb朋友不停更新股神對於金融、經濟、投資等方面嘅新聞，真係有可能令你賺到發達嘅情報架！

渣打銀行

fb嘅收入來源係廣告，而唔少銀行為咗宣傳各式各樣投資產品，及爭取年輕客戶群，紛紛都喺fb開設官方page，一於透過網絡平台拉近與潛在客戶嘅距離。孖妹不嬲都鍾意做善事，同埋跑馬拉松，所以我哋like咗渣打銀行（02888）。不過，依家銀行喺fb做宣傳就話免費啫，遲啲fb上咗市，唔知會唔會免費變收費呢？

高妹、彩兒

若有料報畀高妹同彩兒 或有嘢問，可電郵money.biz@opg.com.hk