Market Insight：局勢緩和 一太博反彈

美國消費者信心創四年新高，道指曾經倒升，但收市仍要跌34點，恒指ADR微升，而減RRR會有一定刺激，加上中菲局勢緩和，今日港股高開機會相當大，但港股身子虛弱，隨時彈完又散，上周五亦估唔到恒指跌262點咁多，兩萬點關口話穿就穿，完全唔見支持力。

歐洲仍係最大傷口，希臘再舉行大選已成定局，再選之後預期左翼第二大黨有機會成為最大黨，到時希臘退出歐元區機會將升到75%以上。周末多個歐洲國家都有示威抗議緊縮政策，極端主義逐漸抬頭，歐洲變成了一個死局。

放大圖片

放大圖片

短線超賣回升唔奇

細摩押錯注蝕咗20億美金，股價亦暴跌9.3%，但如果聽細摩講「stay in May」仲慘，未到月中已經蝕到眼坦坦，最慘係五月首個交易日設埋個走勢陷阱引君入甕，由高位計已回調約1,484點；如果由舊年尾恒指由萬八點起步計，到今年二月中高位累升約3,760點，即係回調幅度已接近0.5，短期超賣下已有資格隨時反彈。

但空軍肆無忌憚，上周五沽空金額佔總成交升至11%，計及現時窩輪及牛熊證成交已大減情況，沽空比例實際已逼近去年高峰時，港匯亦隨股市跌至7.764。

廣藥飲涼茶有錢途

王老吉紅罐之爭終告落幕，廣藥（00874）阿媽除咗以「生母」身份取回擁有權之外，仲擁有向「養母」鴻道申索的權利。當然，廣藥連日已炒定飲涼茶消息，近日更急聘3,000人準備歡迎王老吉歸隊。

阿媽已講明王老吉日後將注入上市公司，對廣藥得益幾大要視乎注資條款，但相信係會發A股畀阿媽，皆因A股較H股溢價125%，換言之，H股股東實有着數。

王老吉每年銷售額達200億，但廣藥計埋合併白雲山後年銷售額亦得100億元左右（包括王老吉綠罐收益），即係俗稱蛇吞象，未來已非以藥業股去估值，而係變身為飲品股。

同係飲涼茶，霸王（01338）被傳竄改生產日期及賣過期產品，雖然集團已經否認咗，但消費者對保健品安全性特別敏感，肯定對集團招牌構成一定打擊。交銀之前出報告唱好，預測霸王明年可轉虧為盈，但依家只可講句：世事難料。

講開涼茶，仲有瑞年（02010）旗下之「順」牌，瑞年呢大半個月由2.5元急插到1.84元，日日創新低，往績PE得3倍，持有現金已差不多等於公司市值，但民企股？搵你愛！

唔掂得嘅仲有好多一直向下炒之細價股，寶源（00692）又玩大供股，近兩年半供股3次，較當年永義（01218）年年供股有過之而無不及，發行股數增加616倍，供股之後又大合股，現價相當於合股前之0.00068元，簡直有如無底深潭。

業務風險高極有限

中國變相出到經濟制裁，菲律賓立即硬不起來，菲律賓概念股第一太平（00142）連跌多日之後，上周五倒升收市，顯示唔少人亦趁低撈貨。公司嘅業務涉及菲律賓電訊、基建同採礦業，除非打仗啫，業務風險性實在好低。

第一太平股價由上月高位9.32元，回落至上周五低位僅7.85元，累跌幅度達15.7%。上周14日RSI低見28，觸及250日線7.93元後始作出輕微反彈，上周五收報8.01元。短線料以整固為主，先觀察局勢發展，若能和氣生財，反彈一成唔係難事，向下7.5元乃重要支持。

古勝