Market Insight：零售股暫時唔使睇

歐洲火頭暫時不在法國，而係欠下巨債又聲大夾惡嘅希臘，極端左翼揚言拒絕削債及不履行救助條款，嚇到全球股市再冧，英法股市今年升幅已全部蒸發。其實事件並非無轉圜餘地，籌組聯合政府一拍兩散嘅機會相當高，到時希臘要再次舉行國會選舉。弊在目前人心虛怯，歐股昨早段僅德股保持不失。

恒指已跌穿250日線，剩得100日線未穿，短期支持係保力加通道底部20,127點及上次低位20,035點，連騰訊（00700）亦已腳軟，港股由中移獨大更有托住來沽嘅味道，當中移係公用股來解釋升因，但其他3隻公用股一樣要跌。中移主要靠4G孭飛，但潑冷水講句，中移推3G之後ARPU亦係一路跌，香港4G收費都唔高得過3G，隨時係想像美麗、現實殘酷。

放大圖片

放大圖片

外電報道，「十八大」可能要押後到今年底或明年初，亦對中港股市構成心理影響，除咗驚會有權力鬥爭之外，有分析話中國遲遲唔放水都係驚喺換屆前會加劇通脹，所以視十八大係一個分水嶺，如果真係押後，亦可能代表放水跟住會推遲。

同胞慳皮影響浮現

滬深300指數尋日下跌1.9%，插曲係前日中證監主席郭樹清話新股發行「把投資者當傻瓜」，剛退休之明星級基金經理王亞偉話「散戶不適合買任何一隻股票」。股民聽咗可能覺得好刺耳，但其實係現實寫照；香港股民唔係傻瓜亦係水魚，除咗○三至○八年大牛市之外，能夠長線贏錢嘅股票十中無一。

曾幾何時風光過嘅六福集團（00590）、東方表行（00398）同I.T（00999），尋日齊齊創52周新低，一間賣金、一間賣錶、一間賣衫，結果同胞減少消費即告現形，惟有寄望CY上場後，阿爺會再送禮放寬一簽多行。六福前兩次跌穿20蚊都有大反彈（一次彈上45蚊、一次彈上35蚊），但今次冇金價撐住，六福往年盈利大增部分係靠黃金庫存升值。

今日恒指季度檢討，要睇吓思捷（00330）有冇得留低，集團收市後公布第三季度營運數據續有改善，但歐洲呢排再起波瀾，歐元再跌穿1.30，前景再打問號！中國出入口數據亦喺今日公布，航運股已經插定先，明日到CPI。

散戶跟「車」買教訓

中國南車（01766）畀社保基金玩死，社保低買高賣想學淡馬錫乎？但社保一買一賣只賺得50萬，而淡馬錫上個禮拜趁高走咗一批內銀股可稱時機一絕，最慘係上次跟社保上「車」嘅散戶。

潮流電子產品概念股多蘿蘿，但得瑞聲（02018）一枝獨秀，另外一隻超強嘅股係TCL多媒體（01070），雖然創完新高後倒跌，但今年累計升幅已有一倍，集團一○年見紅皆因互聯網電視被叫停，但如今經已重生，所謂互聯網電視、智能電視以及最新嘅雲電視都係同一概念，但就愈賣愈貴，消費者都唔介意畀多一、兩千蚊買最新型號，連聯想（00992）亦宣布推出智能電視產品，最平都要六千五蚊人仔，最貴萬五蚊人仔，賣到咁貴，完全唔同平板電腦及手機以低價搶佔市場策略，但其股價自上周五創收市新高後連續三日大幅滑落，投資者似乎唔係咁buy。

周五內地將公布CPI數據，一般預期通脹持續受控，本來食品等消費股有得諗，但見到除了中國旺旺（00151）、中國食品（00506）及青島啤酒（00168）維持強勢外，多半表現無甚足觀。昨日更見統一企業（00220）股價一度急挫7%，成交達到1.15億元。

食品股正埋身肉搏

事緣內地傳媒報道，今年以來競爭對手康師傅（00322）開始實行「排統計劃」，不計成本地向各銷售點作出補貼，以打擊統一的產品銷路，更有指估計統一為此已損失四萬個銷售點，直接損失兩億元人仔云云。雖然有關數字未經證實，但消息足以對統一的股價造成影響。

查實內地品牌食品市場競爭激烈，商場在商言商各出奇謀亦無可厚非，幸好今年原料價格壓力有所紓緩，有助抵銷工資上升的壓力，但要在銷售額同毛利率方面跑贏同業，就必須要透過擴大產銷以實現規模效益。康師傅與百事可樂的戰略合作值得憧憬，但二者磨合須時，今年是投資期，股價跑輸同業只是暫時性，至於旺旺和統一如何迎戰，就要拭目以待。

古勝