孖妹S檔案：教你睇圖估市增勝算 技術分析5招

技術分析一 動向指數

測市準繩度：4分（5分為滿分）

Nic教路，首先要識動向指數。因為要識得分升市、跌市，定牛皮市，先可以應對呀嘛！

放大圖片	放大圖片	放大圖片

DMI主要由平均方向線（ADX）、正方向線（+DI）及負方向線（-DI）組成。「+DI係價位向上推動之能力，+DI愈大便代表股價愈能升破上日頂位，顯示買盤強勁，後市向上機會高。而ADX則可反映大市趨勢，若ADX高於20便是趨勢市。」

恒指喺四月尾時，+DI已升穿-DI，但ADX仍處於20以下，見圖一，所以Nic話現時港股仲係一個上落格局！咁講法，孖妹一定要好好瞄住個市，等ADX升穿20就入市啦！

技術分析二 對稱三角形

測市準繩度：3分

既然恒指將出現短暫性升市，跟住就梗係想知道會升到咩位啦！Nic建議我哋運用對稱三角形。佢話呢個指標用嚟睇突破位，能夠提醒我哋入貨時機！投資者將每日高位及每日低位用線連起後，若兩線收窄並出現一個三角形，便代表將有另一升浪出現。此外，對稱三角形仲可以量度埋升幅添，約係對稱三角形的第一個頂點及低點之間嘅距離。

恒指走勢便喺三月尾開始呈現對稱三角形，見圖二。「恒指啱啱衝破咗個三角形，反映個市開始湧現買盤，成交量會迅即增加，係追市嘅好機會呀！」

Nic揚言呢個指標好好用，據佢以往嘅測試，其資產回報率可大幅跑贏大市，表現理想，惟命中率較低。不過，Nic指獲利嘅回報率遠高於虧損時嘅平均損失，搞到孖妹心郁郁想試吓。

技術分析三 保力加通道

測市準繩度：3.5分

除咗三角形的技術分析，我哋仲可以睇埋保力加通道。「呢個指標『好使好用』，真係唔可以唔識o架！」Nic解釋保力加通道係由移動平均線加入波幅而衍生出嚟，由「中軸」、「保力加通道頂」及「保力加通道底」組成，可反映市況方向及波動範圍。

他又話，唔少投資者會以中軸為大市強弱訊號，當股價升破中軸時買貨，並可以頂部為目標價。如恒指於四月中後期均在中軸以上（見圖三），揭示大市轉強；相反，價位跌穿中軸時可設淡倉，到達底部便平倉。不過，Nic提醒我哋，保力加通道嘅問題在於落後大市，滯後嘅進場訊息會令投資者無法及時進場，要小心留意。

技術分析四 相對強弱指數

測市準繩度：4.5分

RSI係入門之選，孖妹相信各位散戶都耳熟能詳，可用嚟辨別市況強弱，仲會用嚟睇吓大市有無超買或超賣，以捕捉「頂」、「底」位置。

究竟怎樣才可「摸頂」或「撈底」？Nic解釋，RSI係計算升幅與總體波動嘅關係，當升幅佔總體波幅嘅比例愈高，RSI嘅數值（介乎0至100%）就會愈大。投資者可再設定中間線50為強弱分界，當RSI數值大過50代表走勢轉強，70以上表示進入超買狀態；相反，RSI數值細過50則反映走勢轉弱，30以下便會出現超賣情況。既然係咁，恒指RSI啱啱喺上月尾升穿50水平（見圖四），咪即係反映恒指走勢開始轉強囉！

技術分析五 早晨之星及黃昏之星

測市準繩度：4分

大市走勢反覆不定，雖然依家暫現升市迹象，但孖妹不嬲都居安思危，一定會留意住大市趨勢，先至可以成功配合投資策略呀！因此，Nic推介我哋留意早晨之星及黃昏之星。早晨之星係利好轉向形態，普遍喺跌勢末段出現，黃昏之星則係喺大升市中強烈嘅利淡轉向形態。兩者皆由三支陰陽燭組成。

Nic講過，現在大市正處於上落格局，所以投資者可注意呢兩粒「星」！如果喺回吐時出現早晨之星，即喺大陰燭後出現裂口低開的十字星或陀螺，再出現大陽燭，便能以第二支燭的低位作為止蝕價而進場買貨（見圖五）；反之，大家若發現黃昏之星，先出現一支大陽燭，再出現裂口高開的十字星或陀螺，顯示好淡雙方進入角力階段，最後導致第三支大陰燭的形成，顯示市況開始轉差，投資者大可以第二支燭的高位作為止蝕價。

高妹、彩兒

若有料報畀高妹同彩兒或有嘢問，可電郵money.biz@opg.com.hk