Market Insight：公路股禾稈冚珍珠

截至上周五止，滬綜指本月累升6.4%，反而同期美國標普五百指數跌2.1%，歐股仲麻煩，總統選舉後法國有機會被降長期信貸評級，至於西班牙長短債拍賣雖達標，可是五年期CDS依然唔肯回落，仲企響500點子的危險水平，覆蓋全歐股市的Euro Stoxx 50更跌6.7%，淡友唔等Sell in May，已經提早go away。港股要跟祖國，抑或陪外圍股市繼續從二月份高位繼續調整，唔少股友們都相信早就頭都大埋。

大市成交得四、五百億元，雖然睇唔清楚揸現金，向來是基金界金科玉律，但過去半年唔少芬佬畀個市玩死，去年底未知長期再融資操作（LTRO）咩葫蘆賣咩藥，十一月到今年一月個個揸現金唔敢追，到二月見歐債息回落，先至像羊群一樣大舉risk-on。

中國撐起全球股市？

近期大市翻炒意、西兩隻歐豬融資困難，股市又再受地心吸力影響，加埋唔少基金愛股兼high beta民企爆煲，結果大部分股票基金都有跑輸大市的情況。

美國未見股市、經濟及失業率轉差前，推QE3的可能性微乎其微，第三輪LTRO最快要等六月中G20開會至傾，單靠中國放水可以撐起全球股市？有點天方夜譚。短期而言，今朝十點半滙豐編制中國四月PMI出籠，假如追隨官方數字，由三月的48.3重返50擴張分界線樓上，或者中港兩地股市在逆風下轉強，方有較佳說服力。

港股陰晴不定，炒股唔炒市，有25隻港股上周五創出一年新高，其中一隻係領匯（00823），股價升至31.1元上市後新高。領匯早前辦咗個推廣旗下商場老牌食肆，名為「尋味時光」之活動，被網民斥責是貓哭老鼠，搵藉口加租的伎倆。事實上，上市之後商業利益掛帥的領匯，逼走了不少小商戶，推介活動觸動不少念舊的市民神經，政治極之不正確，管理人真係抵鬧。

領匯商業利益行先

繼樂富中心之後，部分市區商場升格後加租幅度驚人，最近黃大仙中心部分租戶被預告加租三倍，形同趕客。然而，金融海嘯後領匯股價累積升幅132%，完美升浪告訴大家，要領匯盡社會責任是不切實際，只向錢看的股票市場，對強勁的加租能力深具信心，未來要找小商戶尋味，在連鎖式食肆集體進駐的領匯商場，恐怕都幾難。

唔少人希望零息期搵好啲回報，但若果對REITs無興趣，市面上其實仲有好多選擇，滙控（00005）及唔少本地銀行的永贖債券都仲有7厘樓上，中型內房CB息率一般都超過10厘，只係風險成正比。筆者心水新奧燃氣（02688）一隻八年後到期債券，都有7至8厘回報。

受惠融資成本回落

仲係嫌麻煩？近期留意到，年初因為中央扶持物流行業，要求下調路費，引發軒然大波的收費公路股，唔少都有跌過龍的情況。事實上，大部分被要求下調路費的，集中是違規收費公路，又或者收費並不合理的機場高速項目。

市場也擔心中國出口及製造業放緩，來自重型車輛收入難免有所影響，最近和一家收費公路企業管理層傾過，他也承認重型車增長的確較過去幾年放緩。可是，過去兩年中央對國產汽車行業政策傾斜，私人購車稅務優惠下，中產家庭乘用車擁有比率增長可觀，中小房車車流量增長，抵銷重型車持平的問題，加上不少公路企業以浮息借貸為主，在通脹見頂的市場共識下，今年底到明年，息口有下調空間，可以預期中線可享受到融資成本回落的好處。

考慮到以外資形式經營的公路股，被要求下調收費的可能性比較低，現價往績股息率分別有9.1、8.4及6.6厘的路勁（01098）、合和基建（00737）以及越秀交通（01052）最啱心水。路勁由於涉獵房地產發展，或者極度害怕風險投資者，可以將之剔出考慮之列。至於另外兩隻，一二年預期息率分別有8.1厘及7.5厘，則頗適合要求穩定收入的退休人士。