絲絲講場：陳澤武港澳左右逢源
主要喺澳門做餐飲嘅佳景（00703），佢哋董事總經理陳澤武尋日同絲絲食飯。澳門因為賭業發展，成個旅遊業都生生猛猛。陳澤武話三十幾年前，喺澳門已經開展人生第一份工，唔經唔覺做到依家，仲做埋澳門居民添，換言之，喺雙重身份下，港、澳政府派錢，佢都可「袋袋平安」，認真係一份筍工喇！
不過，陳澤武堅稱，自己無葡國血統，係百分之百嘅香港人，屋企都喺香港，只係因為工作關係，成日留喺澳門，所以成為澳門居民，絲絲聽到就好羨慕佢可以「收兩家茶禮」，佢就哈哈大笑：「係呀，兩邊派錢我都有份！」澳門已連續五年派錢，香港只派過一次，加加埋埋接近三皮幾，夠絲絲去一轉旅行。
人脈夠廣 公職一籮籮
絲絲仲發覺，陳澤武有好多個社會公職，包括澳門立法會議員、行政長官選委、餐飲業聯會會長、旅遊發展委員會委員，以至上海政協等，甚至乎涉足體育、影視、文化等，真係八足咁多爪！陳澤武就話，自己又做議員、又有旅遊，點都可以掌握先機，唔多唔少都對做生意有啲幫助，咁又係，人脈廣啲，做起嘢都方便啲啦！