政府擬「空降」港鐵（00066）前行政總裁周松崗，接替夏佳理做下任港交所（00388）主席，由於周松崗欠缺金融相關經驗，惹來業界強烈反彈，日前甚至有消息話有港交所董事未必全力支持佢出任主席添。
面對外界連串質疑聲音，周松崗即刻「做嘢」，佢尋日接受《彭博》訪問時「力撐」自己識得交易所嘅功能運作，佢話自己喺主要上市公司做咗15年行政總裁，好明白上市公司點運作，點樣喺市場籌集資金，佢亦好明白一間交易所嘅真正經濟功能。
周松崗唔肯講佢喺咪政府邀請或者接觸佢做下屆主席，只係話佢係咪主席，係由港交所董事局成員投票決定。
港交所董事局將於二十四日決定主席人選。有唔少市場人士，尤其係中小經紀對周松崗被「欽點」感到失望，仲批評政府只掛住「走出去」，唔理本土經紀利益，但David Webb就話，政府委任港交所半數董事，絕對可以「想邊個做，就邊個做」！
夏佳理日前喺倫敦亦幫口，話港交所需要喺亞洲交易所中「有所不同」，要嘗試同啲「大男孩」玩，換句話講，即係要走進國際層面，做大做強。佢仲話，這或可以從近期政府嘅董事委任中反映到政府嘅諗法。