「新地事件」後，絲絲聽到太多傳聞，絲絲向新地（00016）內部幾個多年老友求證咗幾個傳聞，可以同大家講吓。首先大家都好想知道，大郭生（郭炳湘‧洋名Walter）係咪會返去坐鎮，因為連股壇長毛都咁講，不過絲絲老友斬釘截鐵同大家「say no」。
○八年嘅郭氏兄弟內訌事件大家仲記憶猶新，之前大家咁唔愉快，而且已經過咗咁多年，所以其實董事局成員都覺得，如果Walter入返去，可能反而對運作有影響，所以根本無計劃畀佢返去主持大局，只會畀佢繼續做非執董。
咁絲絲就問，有人成日見到Walter返新鴻基中心喎，老友就解釋，原來Walter響○八年離開董事局後，就響中心搵咗個位做佢私人辦公室，而且只係租用，佢一直都響辦公室處理自己私人事務，同新地無關，最多只係佢開新地會議時至睇吓開會文件。
老友仲話其實呢個月嚟，啲執董高層反而仲積極咗同各部門搞氣氛，仲不時請各部門食下午茶，所以處處融融洽洽，啲員工亦知道事件同運作無關，公司一樣咁搵錢，大家準時出糧，所以士氣都未受影響。
咁絲絲都有搵過Walter求證，不過佢嗰邊就一直未有回應。