呢排民企風暴嘅破壞性好強，盤數有問題嘅，固然走唔甩畀人洗倉嘅厄運，延遲公布業績亦都係畀人洗嘅原因，所以呢輪上市公司都好驚青，連通知股東延遲公布業績嘅通告，都寫錯字，要再發通告澄清，睇嚟真係好趕吓喎。
話說原訂前日（二十九日）公布全年業績嘅創業板股份亞洲資產（08025），尋日朝終於出公告。話因為趕唔切印刷業績同上載時間表「謹迫」所致，要延遲到尋日稍後時間至公布，兼且停埋牌，大家冇睇錯，佢哋真係因為時間「緊迫」而錯用「謹迫」字眼。絲絲以為佢晏晝就復番牌啦，點知佢再出公告話要停牌停到出公布業績為止，真係嚇死班小股民喇！原來佢哋上載業績公布之前發現仲有錯字，需要進一步修正！好彩佢哋真係到六點半鐘公布業績，然後再出通告話周一復牌，今次真係難為一班散戶呀！