絲絲講場：郭樹清影響力威震商界
中文版《財富》最新公布嘅「中國最具影響力的商界領袖」榜單已經揭曉，民營企業家依然係份榜單嘅中流砥柱。但最令人意外嘅，居然係中國證監會主席郭樹清都上咗榜，排名第29位，仲高過平保（02318）老細馬明哲同吉汽（00175）老闆李書福添。
整頓股市獲《財富》好評
話說《財富》八年前首次發布榜單時，曾預言中國企業家將會成為全球商界嘅重要力量。時至今日，呢個趨勢仲愈嚟愈明顯。今年排頭位嘅，仲係華為嘅首席執行官任正非，而聯想控股董事長柳傳志就排第二，佢哋都係榜單嘅「長青樹」。
既然要選有影響力嘅商界領袖，點解郭樹清都會上榜，真係考起人。但《財富》對郭主席上場後，即刻向股市掟出唔少「重磅炸彈」甚為賞識，讚佢對中國資本市場嘅頑疾了解透徹。
入選榜單嘅50人，統統都係大家熟悉嘅企業家，唯一可以打入頭十位嘅香港企業家，就係利豐（00494）主席馮國經，而且排喺第9位，真係一啲都唔失禮。排喺佢前面嘅，有騰訊（00700）主席馬化騰、蘇寧電器董事長張近東、中石化（00386）董事長傅成玉及阿里巴巴（01688）主席馬雲。
余絲韻