孖妹S檔案：股票報價的前世今生 揾食機證傳
股市難玩，祺祺話個荷包嘅錢輸得七七八八，決定去澳洲打工賺錢兼搵個外籍老公，總之後會有期喇！好彩高妹醒目，早就未雨綢繆，搵咗個叫做彩兒嘅美少女返嚟幫手，繼續將孖妹嘅大無畏精神發揚光大。素知「工欲善其事，必先利其器」，難得彩兒初入「缸」湖，於是諗住出番部股票機，不過依家唔少人都用手機上網check股價，股票機仲係咪散戶嘅恩物？
彩兒啱啱喺日本留學返嚟，跟高妹初入魚缸，既緊張之餘亦相當興奮，首要事情當然跟大家打招呼講聲「KONNICHIWA」（你好）啦！隨後便立刻拉住高妹去電訊公司出股票機，但股票機的款式型號琳琅滿目，對產品一竅不通嘅孖妹便立刻去搵救兵，請教電訊數碼嘅兩位專家，並且細談起股票機嘅從前今日。
劉：電訊數碼市場推廣部助理經理劉偉明
戴：電訊數碼項目顧問戴國敏
彩兒：雖然我喺日本讀書，但對股票機嘅歷史都略有所聞，知道第一代嘅股票機係喺九十年代初面世。當時股票交易開始電子化，股票機便順應而生，等股民可緊貼大市嘛。
90年代月費三百元
高妹：第一代股票機只可顯示兩行中文字，提供嘅資訊有限。嗰時股票報價服務係加喺傳呼機之上，不過月費就好「乸脷」，淨係傳呼機嘅秘書台服務就要大約三百元。如果加埋股票報價服務，就額外加多三百元！點解當時嘅股票機服務會咁貴架？
劉：以前股民係專業人士，有經濟能力負擔起三百蚊月費，當時嘅股票機係身份象徵！
彩兒：我啱啱畢業回港，收入唔能夠媲美專業炒家！如果我嘅月費可以計平啲就好喇！
戴：唉，現時股票機嘅月費雖高達二百幾元，但其中嘅120元要繳交畀港交所作數據專利費，所以下調空間唔大。由於難以喺價格上吸引客戶，我哋會主力研發產品，藉住提升股票機嘅質素嚟吸納用家。好似公司喺○四年率先推出具有彩色畫面嘅股票機，及後再推出大屏幕嘅「股神」。到依家，我哋旗下嘅「股神」及「股霸」更已成為股票機嘅代名詞。
高妹：彩兒，你買少件衫咪夠畀月費囉！
彩兒：「衫可以唔『買』，股票要日日睇」呀嘛！
戴：哈哈，你哋仲記得呢個經典廣告！適逢○八年嘅跌市，唔少「師奶」股民都揸住部機「捕」住個價，公司便順勢推出呢個廣告，道出股民即使唔記得洗衫都要睇股票囉！
高妹：呢廿年以來，港股風雨不斷，你哋嘅銷量有冇受到影響呀？
牛皮市時 銷量較遜色
劉：市民喺升市時會怕執輸，跌市時又會驚輸多咗，皆會多咗人出機睇股價，所以股票機喺牛市時會供不應求，喺熊市時亦有需求量，銷量反而喺牛皮市時最受衝擊！
彩兒：近排個個都出智能手機，唔少應用程式附有免費報價功能，股票機會否被淘汰？
戴：儘管智能手機方便易用，但其數據傳送速度需視乎網絡嘅穩定性，而股票機則可透過大氣電波發放資訊，相對穩定迅速。而且股票機係以串流式報價，不斷自動更新股價，唔使用家逐次撳，此外，股票機嘅響鬧「到價提示」功能更可幫助股民部署炒股策略呀！
彩兒：呢個「到價提示」好好用架，若股價到咗預設嘅止賺位或止蝕位，便可自動提醒股民有關資訊。高妹，你都應該出番部去提醒自己，就唔會有咁多蟹貨啦！
高妹：唔使啦，我哋經常拍住上，我將股價set落你部機咪得囉，仲可以物盡其用添！
彩兒：DAIJOUBU（無問題）呢！
用家分享
高妹游走「缸湖」咁耐，好少見到金融界朋友有用股票機，細問之下原來佢哋經常留守辦公室，有齊所有股票報價系統，仲使乜用股票機呀！不過，高妹上星期去飲茶遇到金融界王子鄧聲興，見佢攞住部「股霸」喺度篤吓篤吓，便去同佢傾咗陣偈，問吓用家意見！
喺內地照樣啱使
高妹：你用咗股票機幾耐呀？
鄧：我十年前開始用股票機，當時無咁多途徑可以睇到股票資訊，所以都要依靠股票機去睇股價。不過，中途無人贊助就停咗無用股票機數年，直至四年前又有贊助，就一直用到依家喇！
高妹：你不嬲都係金融潮人，想必你已有唔少潮物如iPhone、iPad等幫你緊貼大市，估唔到咁傳統仲用緊股票機呢！
鄧：透過iPhone睇股價要先登入應用程式，又較為食電，反而唔及股票機嚟得方便直接！此外，即使我哋身處內地，也可透過股票機睇到股價，確係股票機的一大優勢！
高妹：如果無贊助，你仲用唔用股票機先？
鄧：哈哈！如果跟番依家月費計劃，我會覺得偏貴，因我哋喺開市時段都喺辦公啦，好方便check價啦。
彩兒上星期跟高妹到魚缸一行，便已結識到有「荃灣開心果」之稱嘅散戶嬌姐，原來佢之前都有用股票機，但就只係用咗一段短時間！
當年一蚊聽一個價位
彩兒：你用咗股票機幾耐呀？點解用用吓又唔用呀？
嬌：我喺十幾年前有用過呀，嗰時要做生意，唔可以長駐證券行睇價位，又費事去銀行同其他散戶爭睇股價，咪出番部股票機囉！我前後出過兩部，嗰時月費大約二百幾蚊，大概用咗幾個月之後就無再用喇！
彩兒：咁你係點睇股價呀？
嬌：我之後咪打電話聽股價囉！當時大約一蚊聽一個價位，其實都唔平！
若有料報畀高妹同彩兒或有嘢問，可電郵money.biz@opg.com.hk
高妹 彩兒