絲絲講場：高盛靠名師總部沖喜？
高盛舵手布蘭克費恩最近畀個離巢員工唱衰，搞到鬼咁頭痕。英國《金融時報》報道，高盛籌備緊喺倫敦建立新歐洲總部，仲搵嚟著名建築師樓Foster+Partners幫手，唔知係咪想借新總部幫公司沖一沖喜呢？
香港人對Foster+Partners應該唔會陌生，事關佢哋設計嘅「城市中的花園」，就係獲選為西九項目整體規劃圖則嘅勝出者。倫敦人氣標誌性建築物The Gherkin同溫布萊球場都係出自佢哋手筆，真係唔講得笑o架。
委Foster+Partners操刀
報道就話，Foster+Partners構思緊嘅高盛新歐洲總部，將由倫敦金融城一處大型空置辦公室重新改造而成，能唔能夠打造成另一驚世傑作真係要放長雙眼睇喇。
講番高盛呢個新歐洲總部都算波折重重，因為當地政府舊年將選址上嘅一幅壁畫列為受保護歷史建築，搞到高盛要押後新總部大計。如今，高盛雖然準備重新出發，但無論搬遷呢幅壁畫抑或保留喺新總部，都係成本高同費時嘅做法。