絲絲講場：中移王建宙 終於退得喇
中移（00941）董事長王建宙，上個禮拜喺公布業績嘅同時，主動發表「感謝七年多來公司嘅同事及媒體對自己嘅關心和支持」言論，被視為變相發表「退休感言」。事隔一周，佢離任嘅消息或有望得到正式確認。中移母公司中移集團最快會於今日公布人事調動，令中移全面進入「後王建宙時代」！
成日話自己超期服役
絲絲嘅老友話，中移集團已經發出內部通知，話今日正式對外宣布王建宙退休，雖然本港上市嘅中移，佢嘅發言人就話「目前未有收到有關消息」。尋日有人搵到王建宙，佢又再重申番之前嘅說話，「以63歲之齡，按國家規定其實早已是超期服役」。
接班安排早就到位
其實佢退休嘅消息已經過年幾嘅發酵，投資市場已有晒準備，佢幾時正式唔做舵手，實際上只係等待中央嘅一紙公文。集團又做咗好多準備工夫，好似中移嘅李躍，喺前年已接替王建宙出任中移首席執行官，原任工信部副部長嘅奚國華喺舊年七月，調任母公司中移集團黨組書記兼中移副董事長，所以奚國華被視為接班人物係順理成章。
不過值得注意既係，年逾六十嘅奚國華，只可能是過渡人物，事關早喺○八年加入中移嘅李慧鏑，已於上個月調升為中移集團副總經理，呢個舉動應該有下文嘅。
余詩韻