絲絲近日出席中學同學聚會，當時唔明佢哋嘅「養兒之苦」，但尋日聽埋英國保誠（Prudential）話供子女讀大學係家長嘅基本要求，而供子女去外國求學嘅「基本」費係二百幾萬，開始有啲明白現代父母嘅養育負擔，早已今非昔比。
香港同內地嘅家長們對子女要求都幾高，保誠話九成九嘅父母要仔女最少讀完大學，過半仲想佢哋讀埋碩士。
相對地，有逾75%家長話唔介意以攞埋份退休金、賣樓、犧牲生活質素等行動，以滿足子女嘅教育開支需求。
咁究竟供仔女「浸鹹水」要幾錢？保誠計咗條數，由BB出生到順利讀完大學，基本要235萬港紙，若加埋啲課外活動、補習、醫療同玩樂開支咁，仲要再加逾一百萬。所以當年李麗珊話「養大個B要400萬」確係無吹水！
但點解要幫襯保險公司呢？保誠香港首席市場拓展總監麥康祺（Iain McConnachie）就話，依家啲教育開支「通脹」好勁，銀行啲存息又得「雞碎咁多」，所以就多咗「精明」嘅父母，一方面借助保險計劃內嘅投資相連特性「利疊利」；另一方面又可以買個保障咁囉。