絲絲講場：加時唔收番經紀爆內幕
港交所（00388）下周一起加時，劇情發展到港交所今日開董事會。由香港證券及期貨從業員工會會長林德明帶頭嘅反加時遊行，就喺尋日上演，絲絲話業界做咗咁多工夫，都㩒唔到加時決定，不如算啦，佢就會唔罷休，仲話會公開二月九日同港交所行政總裁李小加開會嘅內容喎！唔知到時有咩轟動內幕爆畀大家聽呢？
林會長話，今日會有立法會會議，潘珮璆議員就會喺入面進行口頭質詢，而佢哋就會喺出面聲援，佢仲話，有信心港交所會擱置實施第二階段加時，但係如果港交所唔擱置，佢就會公開二月九日同李小加開會嘅內容喎！佢仲透露，李總當日開會時，有提過話冇諗到業界對第二階段加時嘅反應會咁大！
遊行有過千人撐場
香港證券及期貨專業總會會長王國安同副會長孔慶暉，喺啱啱嘅周日絕食抗議，加埋尋日嘅遊行，似乎乜嘢招數都出齊。尋日嘅遊行都尚算順利，喺遮打花園集合嘅時候，絲絲就問身邊嘅警察哥哥，叫佢估吓嗰度有幾多人，佢就話大約300人；完咗之後發起遊行嘅會長林德明，就話最高峰嘅時候應該多過1,000人，而最後去到政府總部交信嘅時候就應該接近800人。