絲絲講場：減經紀飯鐘食肆好唔掂
尋日絲絲都同大家講過，話香港證券及期貨專業總會會長王國安，會喺嚟緊嘅周日開始絕食，仲起碼絕食24至36個鐘，拚死反對港交所（00388）推行第二階段延長交易時段，尋日佢又發炮，再同絲絲力數呢個政策同港交所嘅不是喎！
怒轟港交所假諮詢
王國安除咗再度炮轟港交所假諮詢，同夏佳理講市場競爭力係謬論之外，王國安仲話，再減多半個鐘lunch time，會帶起骨牌效應，令中環嘅食肆因為業界食晏太趕，食少咗嘢而大受打擊喎！
佢又話，呢排都有試過搵夏佳理同李小加兩位去傾呢個問題，但就質疑佢哋刻意迴避。佢舉例，上個禮拜證券業七大商會團拜，原本做主禮嘉賓嘅夏佳理，就臨時話要出門而缺席。
其實王國安之前表態過支持特首候選人之一嘅唐唐，咁絲絲就問佢，有冇搵佢或者其他候選人反映吓呀？佢就話，依家冇話支持邊個，不過都有同啲候選人傾過，希望佢哋會認真研究喎！