如果有一個人可以教你點「發達」，你會願意畀幾多錢去聽佢嘅講座？絲絲依家就話畀你聽，嗰個當年試過3分鐘賺逾億嘅「華爾街之狼」，就快嚟香港開講座，最低入場費係880蚊，如果真係幫到你搵錢，佢嘅收費就一啲都唔狼。
呢位曾被稱為「華爾街之狼」的喬丹‧貝爾福特（Jordan Belfort）喺今個月二十八及二十九日，會喺香港開壇，搞兩場演講，分享佢嘅心路歷程，同埋教啲創業者點樣「趨吉避凶」。呢個講座嘅門票分普通、黃金、貴賓及白金四種，分別係880、2,480、4,880同埋9,880蚊一張飛。
呢幾種票價，點揀好呢？絲絲老友話，最貴嗰兩款門票可以去埋講座之後嘅酒會，同「狼生」見面；最貴嗰種仲可以影埋相，同埋加送一本簽名自傳。
咁如果買9,880一張門票入場，睇完之後無「發達」，有無得「回水」？呢個絲絲唔識答。但係絲絲粗略計算咗一下，「狼生」今次演講會，以平均價計算嘅每場門票收入都有成430萬蚊，果然係「君子愛財、取之有道」！
貝爾福特係個傳奇人物，賺錢億億聲，又坐過監，出過書，華納兄弟會將佢嘅自傳拍成電影，由馬田史高西斯（Martin Scorsese）執導，里奧勒度迪卡比奧（Leonardo DiCaprio）主演，絲絲諗套戲一定好精彩啫。