絲絲講場：凱德星洲直擊上海商場
電視劇集睇得多，好多人都想轉轉口味，睇一啲現場嘅真人show，因為大家都鍾意原汁原味睇到出鏡人嘅真實反應吖嘛。不過，估唔到連上市公司嘅業績會都可以睇到真人show，仲要係新加坡人偷睇內地人添。
閉路電視直播實況
講緊嘅係凱德商用（06813），尋日喺新加坡搞咗個全年業績會，仲即時喺網上同步播放。除咗講舊年賺咗幾多錢之外，首席執行官林明志當然要將公司最好嘅一面show畀現場及網上嘅記者同分析員睇吓啦。估唔到佢哋即時打出咗個畫面，就係凱德上年買入嘅上海虹口區商場嘅現場內部情況。
原來佢哋係借用商場嘅閉路電視，現場直播入面到底有幾咁多顧客喺度行緊。個鏡頭移左移右，當時大概係傍晚六點，已經有啲食肆要排隊等食飯。最後林明志叫個鏡頭zoom去睇水牌，想話畀觀眾知有幾多大品牌租戶，點知有位大嬸唔通氣，忽然行出嚟擋住咗個鏡頭，咁就全程睇住大嬸個大頭，仲引嚟新加坡嘅現場觀眾大笑添。梗係啦，你用閉路電視偷睇人，點會有人自覺會畀人影住個大頭呢？
余絲韻