全球咁跑無時停
喜馬拉雅山嘅高度，相等於七座ICC加埋咁高，條路咁崎嶇，Walter話跑完之後，腳踝冇損傷，都幾神奇。佢事前都已經加密練習，試過喺完成一周60小時工作後，喺周末跑咗14個鐘。就算放假去到悉尼，11日都總共跑咗160公里，你都咪話唔辛苦喇。
唔知係咪佢嘅堅毅感動咗，佢話17歲、喺悉尼讀書嘅囝囝，嗜好係游泳，竟然喺佢完成喜馬拉雅山之旅後，連續好多日喺gym跑步，加加埋埋有84公里（等於兩個全馬），氹到老竇好開心。
兩父子最近仲喺香港「係咁意」跑咗一轉，跑完「心晴行動飛躍海洋公園慈善跑」，每人跑咗七公里，阿仔仲跑贏130人添。