孖妹缸湖遊：龍年啟市的啟示

「啟示」有揭示、揭開嘅意思。孖妹記得國際炒家索羅斯講過「亂局即大局」嘅投資啟示：「金融市場天生就係不穩定，國際金融市場更加如是，國際資金流動皆有榮有枯，有多頭亦有空頭。但市場邊度夠亂，邊度就可以賺到錢，只要你能夠辨認出混亂，你就可以致富。愈亂嘅局面，愈係膽大心細嘅投資者有所表現嘅時候。」

早前唔少投行兼銀行湧現裁員潮、企業又不斷發出盈警，加上國際信貸評級機構標普連降歐元區九個國家嘅主權評級，孖妹覺得呢啲事件背後一定蘊藏咗啲啟示，只要你睇得通諗得透，賺錢未必係難事。

雷：施羅德投資管理（香港）副董事長雷賢達

唔好望中央放水托市

祺祺： 歐債危機愈拖愈衰，依家仲有九個國家被標普降主權評級，「基金教父」你點睇呀？

　雷： 降級係意料中事，之後呢個情況亦會陸續有來。講真，依家邊個國家係值得擁有三條A評級o架？其實自○八年金融海嘯開始，環球市場已經講緊減債，但係有債務問題嘅國家卻依賴印銀紙、零利率、量化寬鬆、債頂債，以呢啲錯誤嘅方法去減債，最終只會推高債息，令後果更加嚴重。而我相信降評級只係歐債危機嘅導火線，當希臘真係違約，或者其他歐元區國家財政狀況持續惡化，甚至又再出現天災人禍等事件，基本上就會觸發港股再次大跌。　

祺祺： 吓？咁港股會跌到幾多點o架？

　雷： 現時全球經濟放緩，美國經濟會漸趨穩定，亞太區則要慢慢面對放緩問題，而歐洲就需要長時間嘅休養生息。不過，今年有美國總統大選，又有中國政治班子換屆，我相信政治領導人會採取「求穩」策略，所以投資者唔好寄望中央會大幅「放水」去刺激經濟，呢個完全係不切實際嘅希望，而且內地一定會繼續調控樓價。今年我估恒指最高見22,000點，最低見15,000至16,000點。

祺祺： 原來「大選年」都係一種投資啟示，不過我覺得恒指見22,000點唔算高囉，因為呢個點數唔夠力幫我啲「蟹貨」返家鄉喎！

　雷： 其實○八、○九年本來係港股調整年，點知遇上美國次級房貸危機，搞出個金融海嘯，令環球金融市場出現360度逆轉，大家為咗救市，而推出大幅刺激經濟及股市方案，反而令問題變本加厲。老實講，我做咗超過三十年基金經理，今年港股真係最難估嘅一年，所以今年投資者一定要步步為營、量力而為。

祺祺： 三月份業績期未到，但啲企業盈警已經衝到埋身，我同你一樣，對恒指都係無咩信心！

　雷： 盈警又好，盈喜都好，其實投資者要知道到底企業盈利增長數字背後係代表緊咩？呢個數字係真定係假？事實上，現時大部分企業嘅盈利增長都係靠以前嘅過度消費、過度借貸、入不敷支、財赤、低息，透過種種方法喺市場上從中取利而成，但真相係呢啲企業盈利質素係好差。所以，今年我唔建議大家買建材同埋資源股。

張：鴻昇證券董事兼總經理張益祖

港股首季兩萬點穩陣

高妹： 祖哥，今年我估散戶好難靠炒業績賺錢喎！

　張： 炒業績嘅年代已經過去喇，今年係價值投資年，散戶想炒古仔都得，但一定要夠快兼且設止蝕位。依家港股升跌主要受外圍因素影響，如果嗰啲企業唔係恒指成分股，就算佢哋發盈警對恒指點數亦影響有限，但散戶應該加緊關注遲啲滙控（00005）公布嘅業績表現，因為滙控業務牽涉歐美及亞太地區，尤其是由盈利增長就可略知環球金融市場狀況好壞，而業績公布後股價嘅高低，亦可以表現出投資者對環球經濟嘅睇法，對恒指升跌亦有影響性。

高妹： 我個櫃桶底都有一手滙控，不過今年咁多投行、銀行大幅裁員，所以我都唔敢奢望滙控股價會有起色。

　張： 銀行裁員潮嘅出現，係因為銀行有太多毒債喇！當資產大縮水，銀行除咗賣業務出去換錢，就係靠裁人去減低營運成本。舊年好多基金經理跑輸恒指15%已經叫做合格，不過新一年已經開始，佢哋都要開年買貨，所以等到市況穩定啲，基金經理就會出動，有助市場氣氛回升。另外，我覺得歐元區解體嘅機會好微，就算希臘違約，我估市場甚至投資者反而會當係好消息去炒，所以每件事件都會有所啟示，不過點睇就人人看法唔同喇！

高妹： 今日港股龍年啟市，你有咩投資建議畀散戶呀？

　張： 總之散戶記得炒邊隻就沽邊隻，千萬唔好儲太多貨喺手。通常年初股市都會較少出現恐慌性拋售股票，所以首季港股應該有力穩守20,000點附近，之後就等業績期出現。另外我就睇好內銀股、石油同埋煤炭股，散戶可以睇位入貨沽貨。

龍年哪項資產可跑贏？

新年新氣象，送兔迎龍。你認為在龍年，以下哪項資產可跑贏？據今期《東方產經》網上民調，截至昨日晚上六時的結果顯示，46.4%表示「港股」，14.3%表示「物業」，10.7%表示「人民幣」，10.7%表示「債券」，14.3%表示「黃金」，3.6%表示「其他」。

若有料報畀高妹同祺祺或有嘢問，可電郵money.biz@opg.com.hk

高妹、祺祺