市場熱線：中建材估值見吸引

金魚缸喺過農曆新年前已喜氣洋洋，新春期間外圍股市亦表現唔錯，ADR未計尋晚戰果繼續上升百幾點，今日開紅盤相當穩陣，甚至可以輕鬆過埋舊年十月尾同十一月初嘅小雙頂，港股可謂氣勢如虹，單邊爆升破完頂之後，至少可升多三幾百點，上望舊年九月高位二萬一。

美國企業強生、麥當勞、蘋果公司成績表紛紛報喜，就算錢莊股成績表唔合格，但亦都話好過預期，依家只係差希臘幾時同班債主傾掂數，到時一天都光晒，個市可望暢通無阻。

外圍方面，短期要關注的，是希臘與債權人就削債及債冚債的談判，有機會拖至二月初解決，假期期間，希臘財長及歐央行拋出的條件是債權人自願削減五成，新債息率不高於3.5厘，條件算是相當辣，但從另一「歐豬」意大利十年債息，近日不但沒有因為談判有阻滯而回升，反而慢慢從半個月前的7.2厘，回落到接近6厘，看來債商不認為希臘最後會講唔掂數，在二月意大利續債高峰期前，再爆發新一輪危機的可能性唔大。

不過，雖無近憂但有遠慮，歐洲周身病痛有排醫，當熊仔殺得八八九九嘅時候，可能又係掉頭時候。

放水股炒作近尾聲

春節過後，第一件期盼嘅事係減存款準備金率（RRR），建行（00939）、工行（01398）、農行（01288）同平保（02318）ADR齊升逾2.5%（未計尋晚），所以放完假仍會繼續炒放水股。不過，減RRR早已預咗，到真減時反而冇驚喜；至於中證監高調張揚養老金入市就遇到阻滯，正如港股直通車同國際板都好事多磨，養老金買股票更加有排傾。

龍年未到已炒定龍B股，但古勝講過唔理龍B定蛇B，國策只限生一個，一年好景要見好即收。金飾股其實亦受惠於今年拉埋天窗生埋仔一條「龍」服務，但古勝最like嗰隻六福（00590）乘機抽水，間公司喺祖國開舖主要係以特許經營方式，而香港開舖已經喺彌敦道三步一間，可謂插針都插唔落，其實本身有水兼資金需求唔高，但個市無端抽高，唔趁機抽水對唔住自己，而有16億人仔茄薯嘅李寧（02331）亦要發CB，個市升親就抽水也瘋狂。

祖國喺三月開兩會前會陸續公布各個行業「十二五」規劃，最近公布嘅兩個行業係醫藥同造紙，其中醫藥業目標係每年增長兩成，而造紙業會淘汰超過1,000萬噸落後產能，規劃能否達到目標係長遠嘅事，但講嗰陣前景當然一片美好，喺市況氣氛好嘅時候，隨時成為炒消息對象。

追大升股可能執到寶亦可能踩中地雷，金威啤（00124）急升後話計劃出售資產，而奧思（01161）則宣布~H2O+收回中台經銷權，如果只係跟炒性質就等同賭大細。

水泥股一向同個市拍住上，點解水泥股會成為beta值咁高嘅板塊無從稽考，但呢個現象已持續咗幾長時間，所以睇好個市買水泥股就最簡單。水泥股呢排普遍發盈喜，但盈喜攙有水分，因為計落條數，舊年第四季仲賺少過第三季，而且今年首季水泥價格仍在下跌當中。

不斷提升水泥產能

追捧一類處於下降周期嘅股份好似相當不智，但睇番水泥股估值不高，中國建材（03323）一一年PE只係5倍幾，而公司不斷擴產，舊年產能增加22.5%至2.5億噸，到今年底會再提高到3億噸，未來亦有機會向阿媽收購川煤水泥及攀煤水泥，產能提升可以彌補價格下跌因素，一二年PE亦係5倍左右。

首季係水泥行業嘅淡季，但既然睇好個市自然要兼顧水泥股，而且阿爺放水亦會再次利好內房股同建材股氣氛，所以可以博吓中國建材，目標睇11蚊。