市場熱線：中國南車後發先至

當大部分專家話今年先低後高嘅時候，已隱藏挾升嘅伏筆，古勝上個月已預言會出現單邊市，今個月略有反覆但仍係保持升勢，而古勝早兩日亦話睇落破關無力只係大戶心理戰，等到過年前最後一個禮拜先發動攻勢，等開埋紅盤過完年至慢慢散貨。個市已突破一浪低於一浪嘅形態，原本下一站20,000至20,200點已嫌保守。

標普呢次幫得手

今次標普連環降級冇拖冧個市不特止，仲幫咗好友一個大忙，因為前日法蘭西賣債孳息率不升反跌，歐洲央行早已預備彈藥去應付危機，雖然都係八個蓋冚十個樽，但唔會咁快玩完。其實今個禮拜仲有希臘同班債主講數一關未過，但斷估唔會搞到歐元區一鑊熟。

金魚缸尋日喜氣洋洋，朝早祖國公布GDP，去年全年升9.2%符合預期，第四季升8.9%略好過預期，睇落係支持股市上升嘅另一理由，但其實數據公布後半粒鐘恒指曾回落約100點。跟住有外資大行又話中國經濟軟着陸，突然又翻炒養老金入市單消息，A股到十一點至起步發力，埋單滬綜指升4.18%，江銅、中海發展、中遠、中鋁同紫金嘅A股都升停板。尋日得中港特別癲，新加坡升2%，其他亞洲魚缸升2%以下。大鱷轉軚玩龍股，睇人仔由溢價轉折讓已有迹可尋，炒高之後等新一批養老金、QFII、RQFII接貨。

4元水平支持強

尋日升勢都幾全面，水泥股過去一年係恒指放大器，所以升市一定上榜，金銅鋁煤呢幾樣商品亦做好；另外A股升得咁勁，並帶動兩大保險股升超過7%，國壽（02628）亦重上20蚊關口；中遠（01919）升近一成，踏入一二年由強轉弱嘅零售股同電訊股齊齊反彈。

A股同H股計指數都係升4點幾個巴仙，但個股表現各有千秋，值得一提係中國南車（01766），A股升7.2%，但H股僅升3.9%，隻股兩次見5.5元升唔穿，但跌到4蚊邊開始反彈，望佢重上5.5元都仲有15%上升空間。

公司之前已發盈喜，估計全年賺多五成以上，計落一一年PE係11倍；金魚缸此時不同彼時，舊年最悲觀嘅時候通街都係幾倍PE股，事隔兩、三個月又唔同晒，加上一一年大部分公司都賺少咗，比較之下，南車PE又真係覺得平，計埋增長率更係賣大包。

當然，如果南車年年可以賺多幾成嘅話，呢個價位直情可以瞓身買，不過，今年講到明鐵路投資會縮皮，所以能否維持咁高增長速度實在有疑問。但就算高鐵縮皮，南車仲有城際輕軌、地鐵同海外定單保持增長，港鐵（00066）亦買咗批南車車廂，經過舊年撞尾陰影，國產貨始終驚驚哋。

祖國同胞冇得揀，唔搭飛機就搭高鐵，所以近月高鐵載客量已回復正常，阿爺已拍心口支持高鐵發展。舊年嘅「衰股」已大部分翻生，南車全年股價插咗超過五成，能夠上番一半即7、8蚊已相當和味。