經濟愈嚟愈差，要搵筍工都好難，不過，近日有個搵工網站貼咗份筍工廣告，內容大致係話有一間享負盛名嘅銀行，以時薪40大元請人幫手執嘢（Packing），工作地點喺奧運站，令人即時聯想到係獅子行，不過，獅子行就話唔關佢哋事。
點解聯想到佢哋，除咗地點之外，獅子行要削減三千職位嘅決定，依家仲係進行緊，直情係人心惶惶，上星期至傳出農曆新年後1,000人收大信封，雖然佢地澄清係「純屬揣測」，幾時落刀都係時間問題啫，呢個廣告又難怪大家以為係獅子行。
絲絲即刻睇番個廣告，確係話有間知名嘅香港銀行想請臨時工，不過就無開名係邊間，工作範圍係執嘢，不過就要求中英文書寫程度良好、勤力兼有心學習、負責任及高度自律，五天工作，返工至二月七日，奧運站工作。
獅子行就話，以上招聘廣告同佢地完全無關。其實，喺奧運站仲有另外一間大型銀行有寫字樓，就係中銀香港（02388）喇，之前佢地話年請1,000人無走雞，唔通臨近農曆新年要大掃除，所以請班臨時工幫手？
余絲韻