資深銀行家黃遠輝（Stanley）退休就嚟四個月，繼續享受生活。佢同絲絲講，退休至今已經外遊3次，分別係隨城規會考察團去西班牙，之後就去咗張家界遊山玩水，最近就去咗昆明打高爾夫球，下個月又會再隨城規會返內地城市考察。
Stanley依家全心投入公職，主要都係城規會同香港舞蹈團嘅工作，其實都幾忙吓，佢話暫時無意再接受一份全職工作，因為依家專注兩份主要公職，需要嘅時間都已經愈來愈多。
除咗公職時間之外，Stanley過住閒雲野鶴嘅生活，不知幾寫意。佢仲話近期睇咗唔少書添，由歷史小說到傳記等等統統唔放過，可以悠閒咁睇下書已經係最享受嘅退休生活之一。
當年Stanley曾經讀過考古學課程，佢話當時買落至今，淨係有關考古學書籍都已經有兩箱「待睇」，不過佢唔會制訂睇晒呢批藏書嘅目標時間，因為個量實在太大，要限時睇晒真係不得了。
對文化同歷史好有興趣嘅Stanley，諗住報名再讀書，可以畀佢踩單車返校園嘅中大，當然係選擇之一，目標都係啲歷史同文化科目，理大有關中國文化嘅課程都好吸引佢。佢話揀好科之後，最快下年九月就重返校園啦。
余絲韻