中移入股台灣遠傳集團呢單刁，拖拖吓已經兩年，至今都仲未成事，究竟係咪趁唔多覺拉倒咗呀？尋日遠傳老闆徐旭東嚟咗香港，絲絲問佢進展如何，答案係等大選完咗先，事關呢段時間冇人做咁大決定喎。近年兩岸喺商業貿易嘅關係確係緊密咗，但政策關係大陸嘅電訊公司入股台灣同行暫時就不准喇，所以要逐單睇。
佢仲話就算入股唔成，遠傳同中移都會繼續緊密合作。佢話台灣嘅網上遊戲好出名，大陸同胞都好鍾意台灣嘅流行歌，所以第日遠傳同中移喺遊戲、音樂同雲端嘅領域都可以合作。徐老闆係台灣電訊業巨子，對流動電話零舍敏感，尋日成班朋友坐埋一枱同佢傾偈，個個都將手提電話擺係枱上，徐老闆感嘆咁話：「睇嚟個個都係用smart phone（智能手機）！」