美國聯儲局伯南克刺激經濟出盡法寶，其實佢自己都係放鬆銀根措施下嘅受惠者嚟o架！《華爾街日報》爆料，話伯南克喺○四年美國樓市高峰期，位處華盛頓附近買咗間二千一百方呎嘅三房大屋，雖然依家仲高過買入價少少，但為咗畀少啲按息，幫間屋轉按咗兩次。
第一次轉按係喺○九年底，第二次就喺今年九月，聯儲局啱啱推出「扭曲操作」（OT）嚟推低長息，伯南克當然把握機會啦，因為佢供緊嘅係三十年期按揭噃，仲話佢跟其他人一樣，要提交工作證明同糧單先獲銀行批准新做按揭。
連伯南克都要度縮數，實在令人費解，雖然政府份糧係奀啲，但以前佢喺象牙塔寫落教科書嘅版稅，同埋大學留畀佢嘅退休金，都有數百萬美元，第日佢退下火線更加唔使愁，淨係巡迴演講都賺到笑！佢有好多聯儲局前伙記返去華爾街之後，荷包腫脹唔少。
不過，伯南克唔少戰友都離開聯儲局，例如前副主席科恩，如今較為老友嘅有財長蓋特納，佢哋一個月會約三、四次出嚟食飯，話題離唔開財金決策，有時會交換下睇書心得！伯南克仲話，喺過去十八個月，就用亞馬遜Kindle睇咗二百本書，大部分都同太太Anna喺屋企食完晚飯後睇，但全部同金融危機無關，事關佢已見過原裝正版了！