絲絲講場：細行拉閘第一滴血
歐債危機愈演愈烈，美國經濟又疲弱不堪，大市呢幾個月都冇運行，成交每下愈況，加上唔少證券行紛紛割喉減佣，以擴大市場佔有率，細行搵食愈嚟愈艱難！尋日就有一家經紀行──俊雄證券，通知港交所（00388）會暫停營業，直至另行通告為止。
絲絲即刻打過去俊雄證券問個究竟啦，公司員工證實已經冇做生意，但絲絲就未能聯絡到公司嘅負責人，了解公司點解要暫停營業，同埋客戶啲倉點處理。
絲絲惟有問吓啲炒鬼經紀朋友，佢哋不約而同報料話，俊雄證券規模好細，喺市場上唔係咁多人認識。
翻查證監會資料，原來俊雄證券係喺去年十二月二十八日至攞到證券交易牌照開業，換言之，不足一年「貨仔」，公司就要暫時「鳴金收兵」。證監會發言人就話唔作評論。
老行尊：市況衰過「沙士」
俊雄證券辦公室設喺金鐘海富中心，絲絲上過公司網站，設計好「簡約」，但網上交易服務已經中斷。
其實有唔少證券界老行尊早前已同絲絲「警告」，喺依家嘅市況下，小型經紀行經營環境好困難，直言情況仲衰過○三年「沙士」，希望小經紀都能捱過呢過嚴冬啦！
余詩韻