市場熱線：北控勝在瓣數多

買股長揸不合時宜

歐盟修改條約之前講到非常關鍵，開完會後又畀人話冇料到，三大評級機構仲落井下石，評級檢討要等到出年首季，但其實好快到，意粉國明年初一大筆債要續期就知生死。

滬綜指跌穿完2,300點呢個所謂「政策鐵底」之後，尋日繼續摸底，再跌多1.87%，而成交比前日增加近40%。有內地傳媒即刻計數，話A股價位重回十年前，期間樓價升咗10倍，豬肉每斤由6蚊升到16蚊，GDP增長3倍。當然，A股有息派，豬肉冇息派，實際冇差咁遠。以前A股60倍PE，依家十幾倍PE，只可以話由瘋狂回歸理性。

不過，持有股票長揸跑贏其他投資嘅理論已受到質疑，尤其未來可能要面對「迷失十年」，祖國經濟增長亦已見頂，所以咪再迷信「往績」。但唔買股票有乜好買？花旗國債得兩厘息仲衰過做定期，內房債券至少有十幾厘但風險太大，連最穩陣買人仔都話驚貶值。

尋日港股成交再縮到455億元，國指再跌穿萬點關口，最穩陣嘅股票仍係恒安（01044）同粵投（00270）之類。中播（00471）呢排升幅似一支箭，但市值仍得2億幾，隻股係海外電視手機概念，值幾多錢只係靠估。

以前炒彩票股、三網融合股、物聯網股，大部分已經冇影，依家最流行嘅係雲概念，差唔多所有科技同通訊公司都話自己投資好多錢落去，但古勝只係覺得一舊雲，睇見科技公司股價亦唔多開胃，浪潮（00596）要贖番微軟批優先股，金蝶（00268）頻頻回購亦跌穿2.5元嘅重要支持位。

收入增長步伐持續

冇嘢炒本來最好炒新股，但大超額嘅OTO（06880）只能守住招股價，今日有寶信（01293）同中國多金屬（02133）登場，暗盤價先潛水，部分微型新股上市目的只係為咗個「殼」，等多兩年或者翻生。

中國燃氣（00384）名花有主，由新奧（02688）同中石化（00386）聯手收購，古勝講過中燃喺內地有百幾個項目，遲早會由中資背景公司一統江山。燃氣股今年亦一直跑贏大市，至於加價單嘢漸有眉目，鄭燃（03928）獲河南省批准加價18.4%，既然住宅用電已準備實施階梯電價，相信民用燃氣全面加價亦不遠矣。

呢排表現最好嘅燃氣股係北京控股（00392），股市4連跌佢升咗3日，只有1日係微跌，唔通北京亦好快加氣價？北控派完中期成績表先翻生，皆因北京上半年天氣較熱，令到公司中期成績表認真麻麻，而之前股價已有啟示；近日股價則預示下半年成績表會有進步，北京現時氣溫已係零度以下，天氣愈凍，北控股東愈開心。

北控其餘業務包括啤酒、水務同收費公路，其實以啤酒收益最穩健增長，水同路則夠穩定。個市呢排咁波動，揸住北控呢個冬天最安樂，包冇甩拖。

古勝