市場熱線：一拖農業股首選
尋日外圍消息好壞參半，歐元區開財長會議暫時內容都係外電之前爆料嘅版本，標普降大笨象（00005）在內多間錢莊評級，花旗國消費信心突然急升但樓市依然疲弱，港股升完兩日之後已經冇力，早段跌百零點，衰在A股驚外資撤資跌逾3%創咗4個月來最大單日跌幅，恒指萬八再度不保，收市跌267點報17,989點，但期指轉高水93點。夜晚人行宣布減存款準備金率0.5個百分點，再加上全球央行向市場放水，今日淡友冇運行。
呢排消息滿天飛，歐洲固然多流料，內地無端端傳推國際板，A股亦如無定向風，今日要睇住EFSF有乜符弗，而祖國亦會公布官方十一月PMI數據。EFSF無論點樣槓桿化，但都係塘水滾塘魚，為歐豬債券擔保兩、三成又如何？希臘一「剃頭」就七成，意大利借錢利息接近8厘，葡萄牙要十幾厘，殊途同歸，一係等死，一係印銀紙遲啲死。
有胡唔食又得個桔
MSCI指數大執位嘅日子，港股成交亦激增到780億元，但除咗中升（00881）之外，隻隻「新貴」都跌，反而被踢出局嘅思捷（00330）錄得6連升。古勝尋日已提醒大家，散戶想搵呢類着數已經唔易，尾市買盤雖然勁多，但沽盤仲多！好似達芙妮（00210）連日創新高如果都唔食胡，到倒數至離場盞人踩人。
花旗國感恩節零售大旺，前晚公布嘅消費者信心指數更係升爆燈，連帶呢兩日祖國零售股都有一團火。古勝唔係零售專家，但人同此心，見減價自然會買多啲，花旗零售暢旺但收入前景黯淡屬於反邏輯，所以未必會旺到聖誕。而本地賣衫股逐隻見光死，威高國際（01173）業績前勁升、業績後驚嚇，YGM（00375）成績表合格亦一樣被插，經濟轉差嘅話，賣衫不如賣廁紙、衞生巾。
流傳咗好耐嘅祖國加電費卒之尋日揭盅，每度電加3分，比孖屐預期嘅2.5分略多，但住宅用電唔加。內地用電主要係工業用途，所以暫時唔加住宅用電影響不大，何況阿爺將為民用階梯電費諮詢意見，另為現貨煤價設定每噸800蚊人仔封頂，政策對電股係好消息，對煤股同工業股係壞消息，但單嘢已講咗咁耐，尋日3隻國企電股齊跌5%左右。
成績表繼續有保證
尋日本地上市嘅三隻農業股都升，包括第一拖拉機（00038）、中化肥（00297）同中海石化（03983）等。祖國農村扶貧標準大幅提高到2,300蚊人仔，所講嘅係一年收入，每個月賺唔夠200蚊人仔，就算扶持都唔會買得起拖拉機；但阿爺呢幾年良心發現，不斷將利益向農村傾斜，農村收入愈來愈好，出年農機購置補貼按年上升24%至137億人仔，所以一拖出年成績表應該有番咁上下保證。
一拖今年上半年僅賺多2%，難免令人失望，但下半年係淡季，全年成績表唔會有太大差距。一拖名副其實係內需股，產品好少出口，亦唔會點受外圍經濟環境影響。其實出年祖國農業發展勢頭應該唔錯，農產品價格仍會處於高位，而日本土地受輻射污染，未來糧食供應可能要倚重中國，買農業股點都穩陣過買工業股或資源股，尤其一拖有農機補貼支持，現價PE低於10倍，風險屬於偏低。
古勝