絲絲講場:周光暉堪稱董事獎「星爸」

一年一度嘅香港董事學會傑出董事獎,尋日揭曉,多名知名人士都有上榜。同其他好多選舉一樣,要有人提名至可以做候選人,唔講唔知,前會計師公會會長周光暉因此升呢做咗「星爸」。何出此言?原來佢非常「好腳頭」,佢提親邊個,邊個就當選,你話係佢好眼光,定係好彩呢?

今屆攞到傑出董事獎嘅,包括莎莎國際(00178)主席郭少明、領匯(00823)主席蘇兆明及行政總裁王國龍、招商銀行(03968)副行長張光華、安東油田(03337)董事長羅林、幻音數碼(01822)主席廖家俊等,都榜上有名,真係恭喜晒!

周光暉都算犀利,眼光獨到,今年佢連中三元,提名王國龍、蘇兆明同張光華,三人都成功攞獎,成功當選傑出董事,真係冇令周光暉「跌眼鏡」,「星爸」呢個榮譽真係實至名歸。

過往提名「戰績」彪炳

絲絲發現,周光暉唔係「撞手神」,佢嘅過往紀錄的確幾彪炳,佢○八年曾提名秦曉、馬蔚華;○六年提名周松崗;○五年提名港交所(00388)董事會,最後統統獲獎。封佢做「星爸」,斷估都冇乜人反對啩?

絲絲就心諗,如果叫佢提名香港小姐,會唔會都成績過人呢?如果係,考慮吓提名絲絲呀!

余絲韻

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!