歐債危機燒到埋身，歐洲金融穩定機制（EFSF）當然要再做嘢！依家救市基金規模4,400億歐元，喺扣除為愛爾蘭、葡萄牙仲有希臘預留嘅資金後，就只剩低2,500億至3,000億歐元。要救市基金擴大至1萬億歐元嚟防風，似係冇可能；以救市基金嘅槓桿程度而言，擴大一倍已經好盡！
除擴大槓桿呢個建議，另一建議係，EFSF為歐債提供局部損失嘅擔保。之前官員將損失擔保水平定為20%，稍後可能要將擔保水平提高至30%。事實上，為損失提供擔保，以及谷大EFSF個槓桿，係兩條好唔同嘅路；前者係用僅有嘅資金，去為「一旦有起事上嚟」嘅情況孭飛；後者就係瘋狂注資，有起事上嚟，人哋走數，你就中晒招！
聯儲局主席伯南克上星期喺答問大會度話，美國經濟過去兩年已恢復增長，但好多人感覺唔到，失業率高企，四成失業人士待業超過半年；當局會專注地支持創造就業，並令通脹受控。
另外，佢話美國經濟前景繫於歐債危機嘅結果，又勸喻央行唔好加速通脹去振興疲弱嘅經濟。不過，伯老講嘢好多時會因為市場改變而變招，大家如果記得，佢過往都好多次出其不意量化寬鬆，今次可能亦只係故技重施。
香港大學電子金融服務榮譽助理教授徐燦傑