絲絲講場：澳盛銀行旺角旗艦店 中澳合璧慶開張

藍色醒獅夠晒特別

嚟到中國人嘅地方，自然要入鄉隨俗，所以就安排咗三隻醒獅助興，不過紅色、金色嘅醒獅絲絲就見得多，藍色嘅醒獅真係少見，絲絲都幾佩服佢哋係邊度搵到呢隻「稀有品種」。來自澳洲嘅澳盛銀行，當然要搵番啲澳洲特色，於是佢哋就邀請咗一班大隻佬，化身成為澳洲土著，表演當地嘅傳統音樂舞蹈，大隻佬赤膊上陣，夠晒熱情奔放。

總裁邵銘高無現身

唯一美中不足嘅係，澳盛總裁邵銘高（Michael）未有蒲頭，由澳盛銀行亞太區、歐洲及美洲行政總裁范思博主持大局。不過澳盛銀行咁緊張內地客生意，香港作為橋頭堡，絲絲希望有多啲機會同Michael喺香港碰面敍舊啦。