市場熱線：中通服小注怡情

雖然道指隔晚被「毀譽」嚇一嚇唔見近200點，但美股期指喺亞洲時段已逐步回升，所以亞洲魚缸普遍低開高收，日韓台都倒升，恒指亦由最多跌303點一度收窄到僅跌兩點，但最終仍係3連跌，恒指只係險保50日線，以值博率嚟睇，一旦穿底嘅下跌空間大過博反彈空間，所以此時不應手痕亂買嘢。

美銀行難置身事外

鬥牛國同法蘭西尋日拍賣國債，前者唔達標兼創孳息新高，執筆時兩國CDS亦齊創新高，五年期CDS分別係490點子同234點子，即係「買保險」嘅成本已要4.9%同2.34%，扣咗保險成本得番1厘幾「剩肉」收益，CDS嘅莊家：美國投行賺到笑，但歐豬一爆煲就如一個核彈，所以隔晚「毀譽」提出警告並唔係多餘。

至於意粉國新內閣完全冇政黨背景，其實係一個好現象，「中國模式」可以咁強勁，其中一個原因就係冇政治障礙，但孖屐認為意粉國已神仙難救，所以國債孳息重上7厘樓上。

華創（00291）同莎莎（00178）尋日中午齊派成績表，華創較令人失望，但莎莎晏晝股價表現反而更差。華創業績差喺之前幾日股價已畀大家有咗心理準備，原來超市業務亦會受經濟環境影響，尤其係限價政策，但同時高鑫零售（06808）就不斷創新高，古勝認為華創仍然值得喺25蚊附近落注。

據大行報告所講，喺「十‧一」長假之後，香港部分零售行業出現銷售放緩，而周大福上市將係最後高潮。新世界發展（00017）隻「威士」（02963）連跌5日之後，喺最後一日終於有人臨尾掃貨。

股民最關注嘅係，當周大福上咗市之後，新世界嘅地位會唔會動搖？其實新世界一早已係二奶，周大福今次喺賺錢高峰期以高PE上市，彤叔肯定計好晒數。

4G概念夠晒煞食

電訊設備股係逆市奇葩，包括中興（00763）同中通服（00552）兩大隻以及京信（02342）同晨訊（02000）兩小隻，皆因突然炒起4G概念，中興幫日本軟庫搞4G網絡之後，亦拍住和黃（00013）喺歐洲拓4G，未來收入將有保證，連帶祖國移動（00941）近日亦再度負起托市大任。

中通服亦一樣受惠於4G概念，但中興內地同海外業務各佔一半，中通服客戶則集中喺內地三大電訊商，無疑講業務係中興較吸引，但中通服今年預測PE只係8倍幾，只及中興唔夠一半，今時今日買股都係以穩陣行先，小注怡情可以諗諗。

不過，中通服供股單嘢唔經唔覺已講咗半年有多，主要係中國證監會未批，供唔供都應該有個決定，唔使股東成日心掛掛，其實公司大把現金唔使靠供股，但公司話供股攞錢目的係想開拓海外業務，依家中興同華為接到唔少海外4G定單，中通服若能「衝出中國」亦係一條財路。

古勝