絲絲講場：30%阿太搵錢多過老公
絲絲阿媽嘅年代，多數靠老公份家用過活，為咗應付急時之用，私己錢梗係唔少得。依家時代唔同，女人經濟能力好強，富達國際投資嘅調查更超乎絲絲想像，原來約有3成嘅已婚女士，收入係比佢哋嘅配偶高，有42%更加會負責管理家中嘅總體財富儲備，可見香港嘅女性幾咁厲害。
多無記錄投資賺蝕
講到女性財富管理，絲絲即刻諗起出名數口精嘅富達香港主管程劍慧（Kerry），佢就建議女士要改變財富管理嘅心態。原來個研究發現，大部分女士都認為自己係較保守至中性嘅投資者，仲覺得自己取態謹慎、識得避風險，但喺大部分受訪者喺過去兩年嚟，從來唔記錄自己嘅投資賺蝕。
Kerry話，唔少女性喺缺乏投資顧問幫助，唔知點處理投資，就由「唔知」變到「唔做」，只係將錢放喺銀行就算，佢覺得咁並非良策，所以就醒咗幾招畀絲絲，包括要平衡風險同回報率，因為有時保守策略未必有用；為個人同家庭採用唔同嘅財富管理策略等，當然啦，最好梗係尋求值得信賴嘅專業意見。