金融界近期真係喜事多！最新一單嘅主角係瑞銀亞洲股票衍生產品銷售部董事總經理于正人，佢將於下月初，與拍拖多年嘅女朋友結束愛情長跑，共諧連理。真係恭喜晒！
咪睇于正人喺輪場工作，成日對住啲數據同資金流，原來佢份人不知幾浪漫，揀正喺同未來老婆大人拍拖紀念日完婚，係咪好有心思呢？
話說今次籌備婚禮，都有段小插曲。今年三月，佢去日本旅行兼順道「睇場」，物色婚禮地點，點知幾日後就發生「311」大地震。之後佢就諗住去泰國舉行婚禮，點知近期又撞正當地水災。不過，皇天不負有心人，上天眷顧一對情人，佢即刻將婚禮改行「PLAN B」，喺短時間內就BOOK咗香港淺水灣酒店舉行婚禮。
所謂「塞翁失馬、焉知非福」，原本諗住喺外地行婚禮，依家留番喺香港，仲可以同原來未必會到海外觀禮嘅親友一起見證呢個重要時刻。于正人將會同未來老婆去日本度蜜月，自此，中環又少一個「筍盤」喇！