正所謂巾幗不讓鬚眉，女性喺商場嘅戰鬥力，依家隨時勁過男性，喺中國亦都唔例外。英國《金融時報》就啱啱公布咗「全球商界女性50強」，即係全世界喺商界最有成就嘅50位女士，中國就有5人上榜，證明中國嘅商界女強人絕對唔失禮。
喺榜上排名最高嘅中國女性，就係格力電器嘅副董事長兼總裁董明珠，排名第七，亦係唯一打入十大嘅中國女性。
格力電器雖然冇喺香港上市，大家對董明珠可能未必好熟悉，其實董小姐喺內地嘅知名度好高，被譽為係內地空調業嘅大姐大，佢成功得嚟亦都好有傳奇性。
話說董小姐38歲入咗格力電器工作，先開始接觸電器呢個似乎男性主導嘅行業。但以「不能輸」做口頭禪嘅董明珠果然「愛拚才會贏」，用咗十年時間爬上最高管理職位，並將格力由一間珠海小廠，發展到今時今日已係全世界最大空調製造商之一。
其他上榜嘅包括中國電力嘅李小琳、SOHO中國嘅張欣同玖龍紙業嘅張茵，都可謂耳熟能詳，仲有一位係華寶國際嘅朱琳瑤。