市場熱線：市底仍弱保留實力

港股尋日主要跟住美股期貨同A股插水，但歐股開波後表現唔算差，歐洲央行又擬出手買債，港股未必會玩笨豬跳，不過歐洲已患上癌症周不時復發兼逐步走向死亡，博短線反彈輸面較贏面大，尋日跌市成交增至611億元，牛熊同窩輪佔總成交37%，沽空比例升至9.2%；尋日大部分時間恒指喺萬九點樓下，令到唔少股民忍唔住沽貨。

借錢畀7厘息負擔重

據債市朋友講，7厘樓上抑或樓下係一個重要技術位，而借錢要畀到7厘息，剩係還息已好襟計（試想閣下層樓要還7厘按揭嘅負擔），到時冇事都變有事。而歐洲已經想盡方法同空軍鍊過，依家建議唔准炒賣CDS同埋唔准無貨沽空，唔准炒CDS已講咗好耐，到下月開始喺歐盟27個國家正式實施。

你冇買債券做乜買CDS？CDS已由對沖風險性質變成賭博。其實對付空軍嘅最佳方法係挾死佢，但歐洲本身問題太多，惟有斬腳趾避沙蟲。

未來兩日有意粉國公布新內閣名單，鬥牛國同法蘭西亦拍賣國債，萬九保衞戰能否成功仍要睇住債息，由於市底仍弱，最重要係保留實力。A股腳軟亦幾突然，之前央行票據息率下跌仲以為放水，結果滬綜指反而插水2.5%，但受股神入股IBM所帶挈，幾間同IBM有合作嘅公司都大升，而香港隻祖國IBM：神州數碼（00861）亦逆市升5%，間公司季季成績表都有貨交相當難得，軟件股例如金蝶（00268）同中軟（00354）亦表現唔錯，但同微軟局部分手嘅浪潮（00596）則繼續遇沽壓。

股神買咗隻「傳統」科技股，香港嘅「超人」則對航工股情有獨鍾，買完深中航（00161）又買中航科工（02357），幾時買埋中航工業（00232）呢？跟超人買股未必次次賺，就算跟都要過咗一段時間冷靜期等回落至買。

大摩最識得跟紅頂白

至於大摩就對汽車代理股特別睇得起，MSCI指數大執位，神州指數一次過擸晒3隻汽車代理股：大昌行（01828）、中升（00881）同正通（01728），10隻出同時有10隻入，10隻新貴除咗正通隻隻有得升，以海爾（01169）升5.5%最標青。而思捷（00330）過得初一過唔到十五，喺香港指數被一太（00142）取代。

大摩可算係最識得跟紅頂白，新貴當中，一太同高鑫（06808）近日均創下新高，而中傳動（00658）、綠城（03900）同李寧（02331）呢類發霉股就被踢出局。

恒指同國企成分股分別得電能（00006）同中電信（00728）一隻上升，兩大保險股包尾，而下跌股最慘係威高（01066），呢隻係國指成分股新貴，亦曾經係長勝軍，但自從由高增長股變成中度增長股之後就走晒樣，所以高增長股其實亦係高風險。

古勝